އިންޑިއާ އައުޓް ކެމްޕޭނަކީ ކުރީގެ ރައީސް ޢަބްދުﷲ ޔާމީންގެ ހަރުކަށި ސިޔާސަތެއް ކަމުގައި އަބަދު ވެސް ބުނަމުން އަންނަކަމުގައި ކުރީގެ ނައިބު ރައީސް އަހްމަދު އަދީބު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި މިވަނީ ރާއްޖޭގެ ފޮރިން މިނިސްޓަރ ޑރ. ޢަބްދުﷲ ޚަލީލު އިންޑިއާ އަށް ކުރައްވަމުން ގެންދަވާ ދަތުރުފުޅުގައި އެގައުމުގެ ނޫހަކަށް ދެއްވި ހާއްސަ ބަސްދީގަތުމަކާއި ގުޅިގެންނެވެ.

އިންޑިއާގެ 'ވިއޯން' ނޫހަށް ދެއްވި ބަސްދީގަތުމުގައި މިނިސްޓަރު ހަލީލު ވިދާޅުވީ 'އިންޑިއާ އައުޓު’ ގެ ނަމުގައި ހިންގި ހަރަކާތަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމު އިސް ނަންގަވައިގެން ކުރިއަށް ގެންދެވި ހަރަކާތެއް ކަމަށެވެ. އަދި އެމަނިކުފާނަކީ ވެރިކަން ކުރާ ޕީއެންސީ އާ ވެސް ދުރުގައި ހުންނެވި ބޭފުޅެއްކަން ފާހަގަކުރައްވާފައެވެ.

މިވާހަކަތަކާއި ގުޅިގެން އަދީބު 'އެކްސް' ގައި ވިދާޅުވީ 2004 ވަނަ އަހަރުގެ ޖަނަވަރީ މަހުން ފެށިގެން، އިންޑިއާގައި ތިބި ރަހްމަތްތެރިންނަށާއި އިންޑިއާގެ މީޑިއާތަކަށް ފާހަގަކޮށްދިންފަދައިން 'އިންޑިއާ އައުޓް' ކެމްޕޭނަކީ ކުރީގެ ރައީސް ޔާމީންގެ އިންޑިއާ ދެކޮޅަށް ނަފްރަތު އިތުރު ކުރުމުގެ ވިސްނުމާއެކު އެމަނިކުފާނު ފެއްޓެވި ކެމްޕޭނެއް ކަމަށެވެ.

މި ކެމްޕޭނަކީ ރައީސް ޑރ. މުޢިއްޒުގެ ސަރުކާރާ އެއްވެސް ގުޅުމެއް ނެތް ކަމެއްކަން ރަސްމީކޮށް ސާފުކޮށްދެއްވައި، އެކަމުގެ ޔަގީންކަން ދެއްވިކަމަށްޓަކައި ރާއްޖޭގެ ޚާރިޖީ ވަޒީރު ޑރ. ޚަލީލަށް ވަރަށް ޝުކުރުވެރިވާ ކަަމަށް އަދީބު ވަނީ ވިދާޅުވެފައެވެ.