އަތޮޅުތެރޭގެ ކަރަންޓު ބިލުގައި ވެމްކޯގެ ބިލު ނުހިމަނަން ނިންމައިފިއެވެ.

ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ވިދާޅުވީ އަތޮޅު ތެރޭގައި ކަރަންޓު ބިލާއެކު ކުނީގެ ބިލް ހިމެނުމަށް ނިންމި ނިންމުން ރައީސް ޑރ. މުހައްމަދު މުއިއްޒު ބާތިލުކުރައްވާފައިވާ ކަމަށެވެ. އެހެންވެ، އެ ކުންފުނީގެ ހިދުމަތް ފޯރުކޮށްދޭނީ އަދި ހިދުމަތަށް ބިލް ކުރާނީ މި ހިދުމަތަށް ރަޖިސްޓްރީ ކޮށްފައިވާ ފަރާތްތަކަށް އެކަނި ކަމަށް ވިދާޅުވިއެވެ.

މީގެއިތުރުން ކުނީގެ ބިލަށް ފައިސާ ދެއްކުމުގެ ކަންކަން ވެމްކޯގެ އަތޮޅުތެރޭ ރަށްރަށުގައި ގާއިމުކޮށްފައިވާ އޮފީސްތަކުން ކުރެވޭނެ ކަމަށާއި އެ ކުންފުނީގެ އަވަސްޕޭ ޕޯޓަލުން ވެސް ބިލަށް ފައިސާ ދެއްކުމުގެ ކަންކަން ކުރެވޭނެ އިންތިޒާމު ގާއިމުކޮށްފައިވާ ކަމަށް ވިދާޅުވިއެވެ.

ކަރަންޓު ބިލުގައި ކުނީގެ ހިދުމަތުގެ ބިލު ހިމެނުމަށް ނިންމީ، އެ ކުންފުނިން ހިދުމަތް ހޯދާ ބައެއް ފަރާތްތަކުން ގަވާއިދުން ފައިސާ ދައްކަމުން ނުދިއުމުގެ ސަބަބުން އެކަމަށް ހައްލެއް ހޯދުމުގެ ގޮތުންނެވެ.

އެކަމުގެ ސަބަބުން ވެމްކޯގެ ކޭޝްފްލޯ ދަތިވެ، ހިދުމަތް ފޯރުކޮށްދިނުމަށް ބޭނުންކުރަމުންދާ ބައެއް އާލާތްތައް މަރާމާތު ނުކުރެވި، ބޭނުން ނުކުރެވޭ ހާލަތަށް ވަނީ އައިސްފައެވެ. އަދި އޭގެސަބަބުން އެކަން ހައްލުކުރަން ކުރަންޖެހޭ ހަރަދު އިތުރުވާކަން ވެސް ވެމްކޯ އިން ފާހަގަކޮށްފައި ވެއެވެ.