ރާއްޖޭގެ ތާރީހުގައި އެންމެ ގިނަ ކާގޯ ރާއްޖެ އެތެރެކުރީ ނިމިދިޔަ 2024 ވަނަ އަހަރު ކަމުގައި އެމްޕީއެލްގެ ސީއީއޯ މުޙައްމަދު ވަޖީހު ވިދާޅުވެއްޖެއެވެ.

ފޭސްބުކްގައި ކުރައްވާފައިވާ ޕޯސްޓެއްގައި ވަޖީހު ވިދާޅުވީ ފައިބެއަހަރު ކޮންޓެނަރައިޒް ކާގޯ ޖުމްލަ 66638 (ޓީއީޔޫސް) އެތެތެކުރެވިފައިވާ ކަމަށެވެ. އަދި 150692 (ފުރައިޓް ޓަންސް) ޖެނެރަލް ކާގޯ ރާއްޖެ އެތެރެކޮށްފައިވާ ކަމަށެވެ. އެއީ 2023 ވަނަ އަރާ އަޅާބަލާއިރު، ކޮންޓެނެރައިޒް ކާގޯ އިން 7 އިންސައްތަ އަދި ޖެނެރަލް ކާގޯއިން 29 އިންސައްތައިގެ އިތުރުވުމެއް ކަމުގައި ވެސް ފާހަގަކުރެއްވިއެވެ.

މީގެކުރިން މިރެކޯޑު އޮތީ 2018 އަދި 2019 ވަނަ އަރުއެވެ. އެގޮތުން 2018 ވަނަ އަހަރު 63002 ޓީއީޔޫސް އާއި 123669 ފުރައިޓު ޓަންސް އެތެރެކޮށްފައި ވެއެވެ.

ކޮވިޑު-19 ގެ ބަލިމަޑުކަމުގެ ސަބަބުންނާއެކު ވޭތުވެ ދިޔަ 5 އަހަރަށް ބަލާއިރު، ކާގޯ އިތުރުވި އަދަދަށް މާބޮޑު ބަދަލެއް އައިސްފައިނުވާއިރު، މިއީ ގައުމުގެ އިގުތިސާދަށް މާބޮޑު ދިރުމެއް އައިސްފާ ނުވާކަން ކަމުގައި ވަޖީހު ފާހަގަކުރައްވައެެވެ.

އެހެންނަމަވެސް ރައީސް ޑރ. މުޙައްމަދު މުޢިއްޒުގެ ވެރިކަމުގެ ފުރަތަމަ އަހަރުވެސް، ރާއްޖޭގެ އިގުތިސާދަށް ދިރުން އައިސްފައިވާކަން ކަށަވަރު ކޮށްދެނީ، ނިމިދިޔަ އަހަރު ރާއްޖެ އައި ކާގޯގެ އަދަދު އެހެން އަހަރުތަކާއިއަޅާ ބަލާއިރު ބޮޑުތަނުން އިތުތު ވެފައިވާކަން ކަމުގައި ވިދާޅުވިއެވެ.

އެމަނިކުފާނުގެ ރިޔާސީ ވައުދުފުޅުތަކުގެ ގިނަ ޕްރޮޖެކުޓުތަކެއް 2025 ވަނަ އަހަރު ފެށިގެން ދިއުމުން ރާއްޖޭގެ އިގުތިސާދަށް ދުވަހަކު ވެސް ނުލިބޭވަރުގެ ކުރި އެރުމެއް މިއަހަރު ލިބިގެން ދާނެކަން ޔަގީންވާ ކަމުގައި ވެސް ވަނީ ވިދާޅުވެފައެވެ.

ހަމަމިއާއެކު މިކުރިއެރުމާއެކު ރާއްޖެ އަންނަ ކާގޯގެ އަދަދު ވަރަށްބޮޑު ތަނުން އިތުރުވެގެންދާނެތީ، ޕްރޮޖެކުޓުތަކަށް ދަތިނުވާ ގޮތަށް ކާގޯ މެނޭޖު ކުރުމަށްޓަކައި އެމްޕީއެލް އިން ތައްޔާރުވަމުން އަންނަކަމަށް ވެސް ސީއީއޯ ވިދާޅުވެފައި ވެއެވެ.