ރާއްޖެއިން ފުރާ މީހުން ތިން ގަޑިއިރު ކުރިން އެއަރޕޯޓަށް ދިއުމަށް އެމްއޭސީއެލް އިން އެދިއްޖެއެވެ.

އެ ކުންފުނިން މިފަދައިން އެދުނީ ޖަނަވަރީ 3 ވަނަ ދުވަހަކީ އުމްރާވެރީން ވެސް އަޅުކަަމަށްފަހު ރާއްޖެ އަންނަ ދުވަހަކަށްވާތީ، އެއަރޕޯޓުގައި ބާރުބޮޑުވާނެތީއެވެ.

" އެއަރޕޯޓުގެ މަގުތަކާއި ޓަރމިނަލް ސަރަހައްދުގައި ތޮއްޖެހުން ކުޑަ ކުރުމަށް ތިން ގަޑިއިރު ކުރިން ފުރަން އެއަރޕޯޓަށް ދިއުމަށް އިލްތިމާސްކުރަން."

މީގެއިތުރުން ޕީކު ގަޑިތަކުގައި ޓެކްސީ ސެންޓަރުތަކާއި ޑްރައިވަރުންގެ ފަރާތުން އެއްބާރުލުން ދިނުމަށާއި އެއަރޕޯޓު ސަރަހައްދުގެ ޓްރެފިކް ތޮއްޖެހުން ކުޑަކުރުމަށް ހުރިހައި ފަރާތްތަކުގެ އެއްބާރުލުން ބޭނުންވާ ކަމަށް ވެސް އެ ކުންފުނިން ވަނީ އެދިފައެވެ.

މާދަމާ އެއަރޕޯޓުގެ އެންމެ ބާރު ބޮޑުވާނެކަަމަށް ލަފާކޮށްފައިވާ ގަޑިތަކަށް ބަލާއިރު، ހެނދުނު 6 ން 9 ޖެހުމާއ ދޭތެރޭ 2678 މީހުން އަންނާނެކަމަށް އަންދާޒާކޮށްފައިވާއިރު، 1372 މީހުން ރާއްޖެއިން ފުރާނެކަމަށް ބެލެވެއެވެ.

މީގެއިތުރުން މެންދުރުފަހު 2 ން ހަވީރު 4 ޖެހުމާއި ހަމައަށް2071 މީހުން ރާއްޖެ އަންނާނެކަމަށް ބެލެވޭއިރު، 1091 މީހުން ފުރާނެކަަމަށް ބެލެވެއެވެ.