އެމެރިކާގެ ޕްރެޒިޑެންޝަލް މެޑަލް އޮފް ފްރީޑަމް ޝަރަފް ލިއޮނެލް މެސީއަށް އަރުވައިފިއެވެ.

އެގައުމުގެ އެންމެ މަތީ ޝަރަފަކީ އެމެރިކާގެ ތަނަވަސްކަމާއި އަސާސްތަކާއި ސަލާމަތާއި ރައްކާތެރިކަމާއި ދުނިޔޭގެ ސުލްހައަށް ނުވަތަ އެނޫން ވެސް މުހިންމު އިޖުތިމާއީ، އާންމު ނުވަތަ އަމިއްލަ މަސައްކަތްތަކުގައި ނަމޫނާ ހިދުމަތްތަކެއް ކޮށްދެއްވާފައިވާ ފަރާތްތަކަށް ދޭ ޝަރަފެކެވެ.

އެގޮތުން މެސީ އަށް މި ޝަރަފް އަރުވަން އެމެރިކާގެ ރައީސް ޖޯ ބައިޑަން، ނިންމެވުމަކީ ވަރަށް އާދަޔާ ހިލާފު ނިންމެވެމެއްކަމަށް ވައިޓްހައުސް އިން ވަނީ ހާމަކޮށްފައެވެ. އަދި މިއީ މެސީގެ ފަރާތުން އެމެރިކާ އަށާއި ދުނިޔެއާއި މުޖުތަމައުއަށް ބޮޑެތި ފައިދާތަކެއް ކޮށްފައިވާތީ ރައީސް ބައިޑަން ނިންމެވި ނިންމެވުމެއް ކަމަށް ވެސް ހާމަކޮށްފައި ވެއެވެ.

ލައިނޮލް މެސީ ވަނީ 8 ފަހަރެއްގެ މަތިން ބެލޮން ޑިއޯ ހާސިލްކޮށްފައެވެ. އަދި އޭނާ އެމެރިކާއަށް ބަދަލުވީ ޑޭވިޑް ބެކަމްގެ ހިއްސާ އޮންނަ އެމްއެލްއެސްގެ ޓީމެއް ކަމަށްވާ އިންޓަރ މިއާމީ އާ ގުޅުމުންނެވެ.

މެސީ އަންނަނީ "ލިއޯ މެސީ ފައުންޑޭޝަން" މެދުވެރިކޮށް ދުނިޔޭގެ އެކި ކަންކޮޅުތަކުގައި ތިބި ކުދިންނަށް ބޭނުންވާ ސިއްހީ އަދި ތައުލީމީ ޕްރޮގްރާމްތަކަށް އެހީތެރިކަން ފޯރުކޮށްދެމުންނެވެ. އަދި ޔުނިސެފްގެ ގުޑްވިލް އެމްބެސެޑަރެއްގެ ގޮތުގައި ވެސް އޭނާ އަންނަނީ މަސައްކަތް ކުރަމުންނެވެ.

މެސީ އަށް މި ޝަރަފް ދިނުމުގެ ހަފުލާ، ޖަނަވަރީ 4 ވަނަ ދުވަހު ބޭއްވިނަމަވެސް އެ ހަފުލާއަށް އޭނާ ހާޟިރުވެފައެއް ނުވެއެވެ. ދުރައިލާ އެހެން ޕްރޮގްރާމުތައް ރާވާފައި ހުރުމުގެ ސަބަބުން އެ ހަފުލާ އަށް ނުދެވޭކަން ބަޔާންކޮށް މެސީ، ވައިޓްހައުސް އަށް ފޮނުވި ސިޓީގައި އެ ޝަރަފު އުފަލާއެކީ ލިބިގަންނަކަމަށް ބުނެފައިވާކަމަށް ބޭރުގެ ޚަބަރުތައް ބުނެއެވެ.