ޗައިނާގައި ފެތުރެނީ އާންމުކޮށްވެސް ދައުރުވާ ނޭވާލާ ނިޒާމުގެ ބަލިތައް ކަމުގައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފިއެވެ.

ފައިބެއަހަރުގެ ނޮވެމްބަރ މަހުން ފެށިގެން އެގައުމުގައި ކޮވިޑް-19 އާ ވައްތަރު ނުވަތަ އެފަދަ ބައްޔެއް ފެތުރެމުންދާކަން ބޭރުގެ ބައެއް ނޫސްތަކުގައި ރިޕޯޓުކޮށްފައިވާއިރު، މިއީ މިކަމާއިގުޅިގެން އެޗްޕީއޭ އިން ބަހެއް ބުނި ފުރަތަމަ ފަހަރެވެ.

އެ އިދާރާ އިން މީޑިއާ އަށް ފޮނުވި މެސެޖެއްގައި ބުނީ ދުނިޔޭގެ ސިއްހަތު ޖަމްއިއްޔާއިން، ޗައިނާ ސީ.ޑީ.ސީއާއި ހަވާލާދީ މައުލޫމާތު ދީފައިވާ ގޮތުގައި ޗައިނާގެ އެކި ހިސާބުތަކުގައި ނޮވެމްބަރ 2 ވަނަ ހަފްތާއިން ފެށިގެން ނޭވާލާ ނިޒާމުގެ ބަލިތައް އިތުރުވަމުންދާކަމަށް ފާހަގަކުރެވިފައިވާ ކަމަށެވެ.

މިދުވަސްވަރު ޗައިނާގައި ނޭވަލާ ނިޒާމުގެ ބަލިތައް އާދަޔާ ހިލާފަށް ގިނަވަމުންދާ ކަމަށާއި އިމަރޖެންސީ ހާލަތު އިއުލާނުކޮށްފައިވާ ކަމަށް ބުނެ ފެތުރެމުންދާ ޚަބަރުތަކާއި ގުޅިގެން އެ އެޖެންސީން ބުނީ ފިނި މޫސުމާ ދިމާކޮށް ޗައިނާ އަދި ފިނި މޫސުން އަންނަ އެހެން ގައުމުތަކުގައި އާއްމުކޮށް ނޭވާލާ ނިޒާމުގެ ބަލިތައް އިތުރުވާ ކަމަށެވެ.

މީގެއިތުރުން މިދިޔަ އަހަރާއި އަޅާ ބަލާއިރު ޗައިނާގައި މި މޫސުމުގައި ނޭވާލާ ނިޒާމުގެ ބަލިތައް ފެންނަ މިންވަރާއި، ބަލީގައި ބޮޑުވަރުވާ މީހުންގެ ނިސްބަތް މަދު ކަމަށް ތަފާސްހިސާބުތަކުން ފާހަގަވާ ކަަމަށް ވެސް ވަނީ ބުނެފައެވެ.

މިހާލަތާއި ގުޅިގެން ޗައިނާއިން އިމަރޖެންސީއެއް އިއުލާނުކޮށްފައެއް ނުވޭ. ޗައިނާގައި ފެތުރެމުންދާ ބަލިތަކަކީ އާއްމުކޮށްވެސް ދައުރުވާ ނޭވާލާ ނިޒާމުގެ ބަލިތައް.

މީގެ ތެރޭގައި އެންމެ ގިނައީ އިންފްލުއެންޒާ ކަމަށާއި އޭގެއުތުރުން އާރް.އެސް.ވީ، ރައިނޯވައިރަސް، އެޑިނޯވައިރަސް، މައިކޯޕްލާސްމާ ނިމުއޯނިއާ އާއި ހިއުމަން މެޓަނިއުމޯވައިރަސް ވެސް ފެތުރެމުންދާ ކަމަށް އެޗްޕީއޭ އިން ބުނެއެވެ.

އެޗްޕީއޭ އިން މިހާލަތު ދަނީ މޮނިޓަރ ކުރަމުން ކަމަށް ވެސް ވަނީ ބުނެފައެވެ.