ކުރިއަށް އޮތީ މޫސުން ގޯސް ދުވަސްތަކެއް ކަމަށް މޫސުމާއިބެހޭ ގައުމީ އިދާރާ އިން ހާމަކޮށްފިއެވެ.

އެ އިދާރާ އިން ބުނީ މި ޖަނަވަރީ މަހުގެ 13 ވާ ހޯމަ ދުވަހުން ފެށިގެން މުޅި ރާއްޖެއަށް މޫސުން ގޯސްވާނެ ކަމަށެވެ.

ރާއްޖޭގެ އިރުމައްޗަށް ވާގޮތަށް ސަރކިއުލޭޝަނެއް އުފެދެމުން އަންނަކަން ފާހަގަކޮށް އެ އޮފީހުން ބުނީ ހުކުރު ދުވަހުން ފެށިގެން ރާއްޖެއަށް ވިއްސާރަކުރަމުން މިދަނީ ރާއްޖޭގެ ހުޅަނގު ބިތުގައި އުފެދިފައިވާ ސަރކިއުލޭޝަންއެއްގެ ސަބަބުން ކަމަށެވެ. އަދި ކުރިއަށް އޮތް 24 ގަޑިއިރުގެ ތެރޭގައި ވެސް އެކި ހިސާބަށް ކެރީގެ އަސަރުކުރާނެކަމަށް ބުނެފައި ވެއެވެ.

މީގެއިތުރުން ހޯމަ ދުވަހުން ފެށިގެން ރާއްޖޭގެ ބޮޑު ބަޔަކަށް ބޯކޮށްވާރޭވެހޭނެ ކަމަށާއި އަންގާރަ އަދި ބުދަ ދުވަހު ވެސް މޫސުން ގޯސްވާނެކަމަށް ވަނީ ލަފާކޮށްފައެވެ. އަދި އެ ދުވަސްތަކުގައި ރާއްޖެ ސަރަހައްދުގެ ވައި ބާރުވެ، ކަނޑުތައް ވެސް ގަދަވާނެކަމަށް ލަފާކޮށްފައި ވެއެވެ.