އޭޑީކޭ ސިނަރޖީން ބޭއްވި ފުރަތަމަ ހޭންޑްބޯލް މުބާރާތުގެ ޗެމްޕިއަންކަން ކްރޭކަރސް އިން ހޯދައިފިއެވެ.

އެޓީމުން ޗެމްޕިއަންކަން ހޯދީ ޖަނަވަރީ 17 ވީ ހުކުރު ދުވަހުގެ ރޭ ކުޅުނު ފައިނަލު މެޗުގައި އެޓެކްސިއާ ބަލިކޮށްފައެވެ.

މި މުބާރާތުގެ ގްރޫޕު ސްޓޭޖުގައި ވެސް މި ދެ ޓީމު ބައްދަލުކޮށްފައިވާއިރު، އެ މެޗު އެޓެކްސިއާ އިން ކާމިޔާބުކޮށްފައިވާތީ، ފައިނަލު މެޗަށް ނުކުތީ ކުރީމެޗުގައި ހެދުނު ގޯސްތައް ރަނގަޅުކޮށް، ވަރަށްބޮޑަށް ތައްޔާރުވެގެންކަމަށް ކްރޭކަރސްގެ ކޯޗު ވަނީ ބުނެފައެވެ.

ވަރަށް ވާދަވެރި، ކުޅުމެއް ފެނިގެންދިޔަ ފައިނަލު މެޗުގައި އެންމެފުރަތަމަ ލަނޑުޖަހައި، ކުރި ހޯދީ ވެސް ކްރޭކަރސް އެވެ. ނަމަވެސް އެޓެކްސިއާ އިން ފަހަތުން އަރައި، ހަމަކުރިއެވެ. އެކަމަކު ދެ ޓީމުން ވެސް އެޓޭކަށް ސަމާލުކަންދިނުމުގެ ނަތީޖާއަކީ އެއްޓީމުން ލަނޑުޖަހާތާ މާގިނަ ވަގުތެއް ނުވެ، އަރާ ހަމަކުރުމެވެ.

އެގޮތުން މެޗުގެ ފުރިހަމަ ވަގުތު ހަމަވިއިރު، 6-6 ން ދެ ޓީމު އެއްވަރުވެފައި އޮތުމުން ނަތީޖާ ނެތުމަށް 5 މިނެޓުގެ ދެ ހާފު ވަނީ ކުޅެފައެވެ. މި ދެ ހާފުގައި އެޓެކްސިއާ އަށް އެންމެބޮޑު ހާސްކަމެއް ކުރިމަތިވީ އެޓީމުގެ އެންމެއިތުބާރު ދެ ކުޅުންތެރިންކަމަށްވާ މާޔާ އާއި ނީރާ އަށް އަނިޔާވުމެވެ. އަދި މާޔާ އަށް ލިބުނު އަނިޔާގެ ސަބަބުން އޭނާ ވަނީ އިތުރަފަރުވާ އަށް ހޮސްޕިޓަލަށް ގެންގޮސްފައެވެ. މިކަމުގެ ފައިދާ ނަގައި، ކްރޭކަރސް އިން ވަނީ ދެ ލަނޑު ޖަހައި، ފުރަތަމަ މުބާރާތުގެ ޗެމްޕިއަންކަން ކަށަވަރުކޮށްފައެވެ.

ފަސް ޓީމަކުން ވާދަކުރި މި މުބާރާތުގެ ފައިނަލް މެޗު ނިމުމުން އެކި މަގާމުތަކަށާއި ރަނަރއަޕް ޓީމަށް ޓްރޮފީއާއި މެޑަލް އަދި ފައިސާގެ އިނާމު ހަވާލުކޮށްދެއްވީ އޭޑީކޭ ކޮމްޕެނީގެ އިސްވެރިންނެވެ. ޗެމްޕިއަން ޓީމަށް ތައްޓާއި މެޑަލް އަދި ވިހި ހާސް ރުފިޔާގެ ފައިސާގެ އިނާމު ހަވާލުކޮށްދެއްވީ ފައިނަލް މއޗުގެ ޝަރަފްވެރި މެހްމާން ކުރީގެ ޔޫތް މިނިސްޓަރ އަހްމަދު މަހްލޫފްއެވެ.

މިއީ އޭޑީކޭ ގްރޫޕްސް އޮފް ކޮމްޕެނީގައި ހިމެނޭ ހުރިހައި ޑިޕާޓްމެންޓުތަކުގެ މުވައްޒަފުންގެ މެދުގައި އެކުވެރިކަމާއި އެއްބައިވަންތަކަން އުފައްދައި، ދުޅަހެޔޮ ސިއްހަތަކަށް މަގުފަހިކޮށްދިނުމަށް ބާއްވާ މުބާރާތެކެވެ. އަދި އެކި ޑިޕާޓްމެންޓުތަކުގައި ވަޒީފާ އަދާކުރާ އެންމެން އެއްތާކުން ބައްދަލުވެ، އުފާވެރި ވަގުތުކޮޅެއް ހޭދަކޮށްލުގެ ފުރުސަތު ދިނުމަކީ ވެސް މި މުބާރާތް ބޭއްވުމުގެ މަގްސަދެކެވެ.