ދައުލަތުގެ މުދަލަށް ހިޔާނާތްތެރިވުމުގެ ތެރޭގައި ރިޝްވަތު ނެގުންވާ ކަމުގައި ހުކުރު ހުތުބާގައި ހަނދާން ކޮށްދީފިއެވެ.

"ބާތިލުގޮތުގައި މުދާ ކެއުން" މި މައުޟޫއަށް ތައްޔާރުކޮށްފައިވާ ހުތުބާގައި ވަނީ އެއީ ހައްގު ބާތިލަށް ހަދައި، އަދި ބާތިލު ހައްގުކަމަށް ފުރޮޅައިލާ އާލާތެއްކަން ފާހަގަކުރައްވާފައެވެ.

މީގެއިތުރުން އެއީ ތަފާތު ނަންނަމުގައި ވަރަށް ގިނަ ސިފަސިފައިގައި، މީހުން މަޅީގައި ޖެއްސުމަށާއި، ބޭއިންސާފުން ކަންތައްތައް ކުރުވުމަށް ބޭނުންކުރާ ތޫނު ހަތިޔާރެއް ކަމަށް ވެސް ހުތުބާގައި ބުނެފައި ވެއެވެ. އަދި ހަދިޔާއެއް ނުވަތަ ސައެއް ނުވަތަ އެހެން ނަމެއްގައި ދިން ނަމަވެސް އެ ވާނީ ރިޝްވަތަށް ކަމަށް ބުންޏެވެ.

ހަމަމިއާއެކު ދުނިޔެމަތީގައި އެކަމުގެ އުގޫބާތުން ސަލާމަތްވި ނަމަވެސް އާހިރަތުގެ އުގޫބާތުން އެމީހާ ސަލާމަތް ނުވާނެކަން ކަށަވަރުވާކަމަށް ވަނީ ހަނދާންކޮށްދީފައެވެ.

ހުތުބާގައި އިތުރަށް ބުނީ މުދަލަކީ މާތް ﷲ އެކަލާނގެ އަޅުތަކުން އިމްތިހާނުކުރެއްވުމަށްޓަކައި ލައްވާފައިވާ ސަބަބެއް ކަމަށާއި މުދަލަކީ މާތްﷲ އެކަލާނގެ އަޅުތަކުންނަށް ދެއްވާ ބޮޑު ނިއުމަތެއް ކަމަށެވެ. އެހެންކަމަށް ވާއިރު، އެއީ ބިނާކުރުމަށާއި ފަނާކުރުމަށް ބޭނުންކުރެވިދާނެ ވަސީލަތެއް ކަމަށާއި އެހެންކަމުން މުދަލަށް ރައްކާތެރިވާންޖެހޭނެ ކަމަށް ވަނީ ބުނެފައެވެ.

އިސްލާމްދީނުގައި މުދާ ހޯދުމަށާއި، މުދާ ހޭދަކުރުމަށް ހަރުދަނާ ނިޒާމެއް ލައްވާފައިވުމާއެކު، އެހެން މީހުންގެ މުދަލަށް އަރައިގަތުން ވަނީ ހަރާމްކުރައްވާފައި ކަމަށާއި އެގޮތުން މުދަލަށް ހިޔާނާތްތެރިވުމާއި، މުދާ ފޭރުމާއި، ވައްކަންކުރުމާއި، ޓެކުމާއި، ރިޝްވަތުނެގުމާއި ރިބާކެއުމާއި ޖުވާކުޅުން ފަދަ ކަންކަމުން މުދާ ހޯދުމަކިީ މި ދީން ހަރާމް ކުރައްވާފައިވާ ކަންތައްތަކެއް ކަމަށް ވެސް ހުތުބާގައި ވަނީ ހަނދާންކޮށްދީފައެވެ.