'މަވައްދަތު' ގެ ދެވަނަ ފޯރަމް ހުކުރު ދުވަހުގެ ރޭ ބާއްވައިފިއެވެ.

މިއީ ކައިވެންޏާއި އާއިލީ ގުޅުންތަކަށް އާއްމުން ހޭލުންތެރިކުުރުމަށް ސިލްސިލާކޮށް ކުރިއަށް ގެންދަން ފަށާފައިވާ ޕްރޮގްރާމެކެވެ.

'އިސްލާމިކް މިނިސްޓްރީ އާއި ފެމިލީ ކޯޓު ގުޅިގެން ކުރިއަށް ގެންދާ މި ސިލްސިލާގެ ރޭގެ ފޯރަމްގައި މައުލޫމާތު ދެއްވުމަށް ބައިވެރިވެވަޑައިގެންނެވީ ދިވެހިރާއްޖޭގެ ގައުމީ ޔުނިވަރސިޓީގެ ފެކަލްޓީ އޮފް ޝަރިޢާ އެންޑް ލޯގެ ސީނިއަރ ލެޗްކަރަރ އައްޝައިޚް އަޙްމަދު ސަމީރު އާއި ފެމިލީ ކޯޓުގެ ކައިވެންޏާއި ވަރި ރަޖިސްޓްރީ ކުރާ ސެކްޝަންގެ ލީގަލް އޮފިސަރ އަލްއުސްތާޛް އަބޫބަކުރު ޖައުޙަރީއެވެ.

މި ފޯރަމްގެ މަޢުޟޫއުއަކަށް ކަނޑައަޅާފައިވަނީ "ކައިވެންޏަށް ތައްޔާރުވުން" މި މަޢުޟޫއުއެވެ.

ރޭގެ ފޯރަމްގައި ވަނީ ކައިވެންޏަށް ތައްޔާރުވުމާއި ގުޅޭ މުހިއްމު ކަންކަންކަމުގައިވާ ހިތުބާ ކުރުމާއި، ކައިވެނީގެ އަގުދާއި، ވަލީމާއާއި ގުޅޭ ގޮތުން ދީނީ ގޮތުންނާއި ގާނޫނީ ގޮތުން އެނގެން ޖެހޭ މުހިއްމު ގިނަ މައުލޫމާތުތަކެއް ހިއްސާ ކުރައްވާފައެވެ.