މާޅޮސްމޑުލު ދެކުނު ބުރީ އޭދަފުށީގައި އުފާވެރި ރާސްތާ ޕްރޮގްރާމު ހިންގައި، އިތުރު 3 ރަށެއްގައި އިބަމަ އިފްތިތާހު ކުރުމަށް ބައްދަލުވުން ބާއްވައިފިއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ އިން އޭދަފުށީގަައި އިސްރަށްވެހިންނަށް އަމާޒުކޮށްގެން "އުފާވެރި ރާސްތާ" ޕްރޮގްރާމްގެ ބައްދަލުވުމެއް ބާއްވާފައިވާއިރު، ބޮޑު ތަރުހީބެއް ލިބިފައިވާކަމަށް އެ މިނިސްޓްރީން ވިދާޅުވެއެވެ.

މި ޕްރޮގްރާމުގެ މައިގަނޑު މަގްސަދަކީ އިޖުތިމާއީ އަދި ސިއްހީ ގޮތުން ދުޅަހެޔޮ ބައެއްގެ ގޮތުގައި ތިބުމަށް އިސްރަށްވެހިން ސަމާލުކަންދޭންވީ މުހިންމުކަމާއި ގުޅޭގޮތުން މައުލޫމާތު ހިއްސާކުރުމެވެ. އަދި އުފާވެރި މާހައުލަކުން އިސްރަށްވެހިން އެކަކު އަނެކަކާއި ބައްދަލުވެ، ހިޔާލުބަދަލު ކުރުމުގެ ފުރުސަތު ފަހި ކޮށްދިނުމެވެ.

އެ މިނިސްޓްރީން، އިޖުތިމާޢީ ބަދަހި މަދަދުވެރިން (އިބަމަ) އިފްތިތާހުކުރުމަށްޓަކައި ބައްދަލުވުންތައް ބާއްވާފައިވަނީ އެ އަތޮޅު ހިތާދޫ، ފުޅަދޫ އަދި ގޮއިދޫގައެވެ.

މި ތިން ރަށުގެ ރައްޔިތުނަށް އަމާޒުކޮށްގެން ބޭއްވި ބައްދަލުވުންތަކުގައި އިބަމައިގެ މަސައްކަތްތަކާއި ގުޅޭ ގޮތުން މައުލޫމާތު ހިއްސާކޮށްފައިވެއެވެ.

މީގެއިތުރުން އެ މިނިސްޓްރީން ކުރިޔަށްގެންދާ "ހާލު ކިހިނެއް ؟" އަދި "ކޮންމެ ކުއްޖަކަށް އާއިލާއެއް" ޕްރޮގްރާމާއި ގުޅޭގޮތުން ވެސް ވަނީ މައުލޫމާތު ހިއްސާކޮށްފައެވެ.