ރާއްޖޭގެ ރިސޯޓުތަކުގައި ސެކިއުރިޓީ ބަލަހައްޓަން ތިބެނީ މުޅީން ވެސް ބިދޭސީންނެވެ. ހާއްސަކޮށް ނޭޕާލް މީހުންނެވެ.

އެހެންކަމުން މިއީ އެ ގައުމުގެ މީހުންނަށް ހާއްސަ ވަޒީފާއެއްބާއޭ ވެސް ހިތަށް އަރައެވެ. ނޫންނަމަ، ނޭޕާލު މީހުން ނޫން އެހެން ބަޔަކަށް ސެކިއުރިޓީކަން އަދާނުކުރެވެނީބާއޭ ވެސް ހިތަށް އަރާފަހަރު އާދެއެވެ.

މިއީ ދިވެހީންނަށް ހާއްސަކުރެވިދާނެ ވަޒީފާއެކެވެ. ދިވެހި ޒުވާނުންނަށް އަމާޒުކޮށް 'ދުރު ރާސްތާ' ޕްލޭނެއްގެ ދަށުން މީހުން ބިނާކުރެވިދާނެ ދާއިރާއެއް ވެސް މެއެވެ.

ނަމަވެސް ހަރުދަނާ އުސޫލެއް ގާއިމުކުރެވި، ތަންފީޒު ކުރެވިގެންނެވެ. ބިދޭސީ މީހާ އަށް ދޭ އިނާޔަތްތައް ވެސް ދިވެހި މީހާ އަށް ވެސް ދެވޭފަދަ އުސޫލަކުންނެވެ.

ރިސޯޓުތަކުގެ އިތުރުން ދިވެހި ސިފައިންގެ ބޯހިޔާވަހިކަމަށް ހާއްސަކޮށްފައިވާ 'ސިފްކޯ ހިޔާ' ގެ ސެކިއުރިޓީ ވެސް ބަލަހައްޓަނީ ބިދޭސީންނެވެ. ހިތާމައިގެ ކޮޅެއް ވެސް ނެތެވެ.

ފުރަމާލެއަށް ބަލައިލާއިރު، އެމްޕީއެލް ފަދަ ތަންތަނުގައި ސެކިއުރިޓީންގެ ގޮތުގައި އެތިބެނީ ނޫކަށިފުރައިގެ ދިވެހީންނެވެ. ވަޒިފާ އަދާކުރަނީ އުފަލާއި ހިތްހަމަޖެހުމާއި އެކުގައެވެ. އަދި ފަޚުރުވެރިކަމާ ވެސް އެކުގައެވެ.

އެހެންކަމުން ސެކިއުރިޓީ ގާޑުންގެ ގޮތުގައި ދިވެހީން ބޭތިއްބުމަކީ ރާއްޖެއިން ބޭރުވާ އެތައް ހާސް ޑޮަލަރެއް، ބޭރުވިޔަ ނުދީ ހިފެހެއްޓޭނެ މަގެއް ވެސް މެއެވެ.