ވެރިކަންކުރާ މައި ޕާޓީ ޕީއެންސީ އަށް މެމްބަރުން އިތުރުކުރުމަށް މާލޭގައި ބޮޑު ހަރަކާތެއް ހިންގައިފިއެވެ.

މި ހަރަކާތާއި ގުޅޭގޮތުން އެ ޕާޓީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހު ވިދާޅުވީ މިއީ ރައީސް ޑރ. މުޙައްމަދު މުޢިއްޒުގެ އެދިވަޑައިގަތުމުގެ މަތިން ފެށި ހަރަކާތެއް ކަމަށެވެ. އަދި އަމާޒަކީ އަންނަ ނޮވެމްބަރ މަހުގެ 17ގެ ކުރިން 75،000 މެންބަރުން އެ ޕާޓީ އަށް ހަމަކުރުން ކަމަށެވެ.

މީގެއިތުރުން އެ ޕާޓީގައި މިހާރު ވެސް 65،000 މެންބަރުން ތިބިކަން ފާހަގަކުރައްވައި ފަލާހު ވަނީ ޕީއެންސީ އަށް މީހުން ވަނުމަށް އެދެމުންދިއުމަކީ ސަރުކާރަށް އޮތް ތާއީދު ދައްކައިދޭ ކަމެއް ކަމަށެވެ.

މާލޭގައި ހަތް ދާއިރާއަކަށް ބަހާލައިގެން އެ ތަންތަނުގައި ޓީމުތަކުން ހަރަކާތްތެރިވަމުން ދިޔައިރު، ރާއްޖޭގެ އެކި ރަށްތަކުގައި ވެސް ގެންދަނީ މެމްބަރުން އިތުރުކުރުމުގެ ހަރަކާތްތައް ހިންގަމުންނެވެ. މި ހަރަކާތްތަކުގައި ރައްޔިތުންގެ މަޖިލީހުގެ އެ ޕާޓީ ތަމްސީލު ކުރައްވާ މެމްބަރުންނާއި ސަރުކާރުގެ އިސްމަގާމުތަކުގައި ތިއްބެވި ބޭފުޅުންނާއި ކުންފުނިތަކުގެ އިސްފަރާތްތައް ވެސް ބައިވެރިވެއެވެ.