މިސްޓަރ މޯލްޑިވްސް 2024ގެ ޗެމްޕިއަންކަން ދިވެހި ސިފައިންގެ ކުލަބު (ޑީއެސްސީ) ހޯދައިފިއެވެ.

މިއީ މޯލްޑިވްސް ބޮޑީ ބިލްޑިންގ އެސޯސިއޭޝަނުން އިންތިޒާމްކޮށްގެން ބޭއްވި މުބާރާތެކެވެ.

ދަރުބާރުގޭގައި ބޭއްވި މި މުބާރާތުގައި އެކި ކެޓަގަރީތަކުން ދިވެހި ސިފައިންގެ ކުލަބުގެ ޓީމުން ވަނީ ރަން ވަނަތަކެއް ހާސިލު ކޮށްފައެވެ.

މިއީ ދިވެހި ސިފައިންގެ ކުލަބު މި މުބާރާތުގެ ޗެމްޕިއަންކަން ހޯދި ތިންވަނަ ފަހަރެވެ. އެ ކުލަބު ވަނީ 2022 އަހަރާއި 2023 ގައި ވެސް ޗެމްޕިއަންކަން ހޯދާފައެވެ.

މިއަހަރުގެ މިސްޓަރ މޯލްޑިވްސްގައި އެންމެ ވާދަވެރި އިވެންޓުތަކުގެ ތެރެއިން އެތުލެޓިކްސް ފިޒީކްސް އަޕް ޓު 160 ސެންޓިމީޓަރ އިން ސާޖަންޓް ފަސްޓް ކްލާސް މަހުމޫދު ޒިޔާދު ވަނީ ގޯލްޑް މެޑަލް ހާސިލުކޮށްފައެވެ. އަދި މި ކެޓަގަރީން ސިލްވަރ މެޑަލް ހާސިލު ކޮށްފައި ވަނީ ސްޓާފް ސާޖަންޓް ފަތުޙުﷲ މުޙައްމަދުއެވެ.

ގިނަ އަދަދެއްގެ އެތުލީޓުން ވާދަކުރި މިއަހަރުގެ މިސްޓަރ މޯލްޑިވްސްގެ ޓީމް ޗެމްޕިއަންޝިޕުގެ އެތުލެޓިކްސް ފިޒިކްސް އަޕްޓު 175 ސެންޓިމީޓަރ އިން ލާންސް ކޯޕްރަލް ޢަބްދުﷲ އަޙްސަން ވަނީ ގޯލްޑް މެޑަލް ހާސިލުކޮށްފައެވެ. މިއީ އޭނާ މި ކެޓަގަރީއިން ގޯލްޑް މެޑަލް ހާސިލުކުރި ތިންވަނަ ފަހަރެވެ. އަދި މި ކެޓަގަރީން ސްޓާފް ސާޖަންޓް އިބްރާޙީމް ނަބީލް ވަނީ ބްރޯންޒް މެޑަލް ހާސިލުކޮށްފައެވެ.

މީގެއިތުރުން މި މުބާރާތުގެ ސްޕޯޓްސް ފިޒިކްސް އަޕް ޓު 175 ސެންޓި މީޓަރ ކެޓަގަރީން ސިލްވަރ މެޑަލް ހާސިލު ކޮށްފައި ވަނީ ޑީއެސްސީގެ ކޯޕްރަލް ޢަލީ ސަލީމް އިބްރާހީމްއެވެ.

މި މުބާރާތުގެ ސްޕޯޓްސް ފިޒިކްސް އަޕްޓު 180 ސެންޓި މީޓަރ ކެޓަގަރީން ގޯލްޑް މެޑަލް ހާސިލު ކޮށްފައި ވަނީ ދިވެހި ސިފައިންގެ ކުލަބުގެ ސާޖަންޓް ހުޒާމް ޙަމީދު އެވެ. އަދި މި މުބާރާތުގެ އެމެޗަރ ކެޓަގަރީގެ ސްޕޯޓްސް ފިޒިކްސް އަޕް ޓު 175 ސެންޓިމީތަރ އިން ބްރޯންޒް މެޑަލް ހާސިލުކޮށްފައި ވަނީ ދިވެހި ސިފައިންގެ ކުލަބުގެ ކޯޕްރަލް އަޒާން އަބްދުއްސައްތާރު އެވެ.