ބަހުގެ ދަރަޖަތަކަށް ބޮޑެތި ގޮންޖެހުންތަކެއް ކުރިމަތިވީ ރާއްޖެއަށް ޑިމޮކްރަސީ ތައާރަފުކުރުމަށް ކުރެވުނު މަސައްކަތުގެ ތެރޭން ކަމަށް ލޯކަލް ގަވަރމެންޓް މިނިސްޓަރ އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު މިފަދައިން ވިދާޅުވީ ށ. އަތޮޅުގެ ސުކޫލުތަކަށް ހުޅުވައިލައިގެން ށ. އަތޮޅު ކައުންސިލުން ބޭއްވި ފުރަތަމަ ވާހަކަދެއްކުމުގެ މުބާރާތް ނިންމުމަށް ރޭ ކަނޑިތީމުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކައިގައެވެ.

މިނިސްތަރ ވިދާޅުވީ ބަހުގެ ދަރަޖަތައް އޮޅުވައިލައިގެން ވާހަކަދެއްކުމަކީ ބަހުގެ ގޮތުން ބަލާއިރު، ގަައުމީ ބޮޑު މައްސަލައެއް ކަމަށެވެ. އަދި މިކަން ރަނގަޅުކުރުމުގެ، ރަނގަޅު ބިންގަލެއް އެޅޭނީ ސުކޫލު މަރުހަލާގައި ކަމަށެވެ.

މީގެއިތުރުން މިއަދު ރަނގަޅަށް، ބަހުގެ ދަރަޖަތައް ފަރިތަކޮށްގެން ވާހަކަދައްކަން ދަރިވަރުން ދަސްކޮށްފި ނަމަ، މާދަމާ ގައުމުގެ ބޮޑެތި މަގާމުތަކާއި ވަޒީފާތަކާއި މިއަދުގެ ކިޔަވާކުދިން ހަވާލުވާއިރު، އަޑުއަހަން ތިބޭ މީހުންނަށް ބަހުގެ ދަރަޖަތައް އެނގިގެން ކުރިއަށްދާތަން ވަރަށް ފަސޭހައިން ފެންނާނެ ކަމަށް ވިދާޅުވިއެވެ.

" ބަހުގެ ދަރަޖަތަކީ މުހިންމު ނޫން ބައެއް ކަމަށް އަޑުތައް ފަތުރާ، އެ ސިޔާސަތު ފަތުރާ ހިންގުމަކީ، ދަރަޖަތަކަށް ނުހަނު ބޮޑު ހީނަރު ކަމެއް ލިބުނު ކަމެއް. ބަހުގެ ދަރަޖައަކީ ބޭނުން ނެތް އެއްޗެއް ކަމަށް އޭރު ވެސް، އަދި މިހާރު ވަކާލާތުކުރާ ބަޔަކު މި ރާއްޖޭގައި ތިބުމަކީ، ބަހުގެ ދަރަޖަތައް އޮޅި މި ހާލަތަށް ދިޔުމަށް ކުރިމަތިވި ގޮންޖެހުމެއް." މިނިސްޓަރު ވިދާޅުވިއެވެ.

އެ މަނިކުފާނު ކަންބޮޑުވަނީ ބަހުގެ ދަރަޖަތައް ދޫކޮށްލައިފި ނަމަ ބަހުގެ މުއްސަނދިކަން ގެއްލި ބަސް ހީނަރުވެގެންދާނެތީ ކަމަށާއި ބަހުގެ ދަރަޖަތައް މުހިންމު ވަނީ ބަޔަކަށް ހަމައެކަނި މަތިވެރި މަގާމެއްދޭން އެކަނި ނޫންކަން ވެސް ފާހަގަކުރެއްވިއެވެ. އަދި އެ މީހަކު ދައްކާ ވާހަކައެއް، އެ ދައްކާ މީހަކާ، އެ ނިސްބަތްވާ މީހަކަށް ބަހުގެ ދަރަޖަތައް ނުހިފައްޓައިފި ނަމަ ފަހުމުކުރުމުގައި ވެސް އޮޅުންތަކެއް އަރާނެކަން ވަނީ ފާހަގަކުރައްވާފައެވެ.