ކީރިތި ޤުރުއާނަކީ ހުރިހައި ގޮތަކުން ބެލިއަސް، އެންމެ ބޮޑު ކާމިޔާބީއެއް ލިބޭނެ އެންމެ ވަރުގަދަ ހަތިޔާރު ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.

އެ މަނިކުފާނު މިހެން ވިދާޅުވީ ހއ. އަތޮޅު ކައުންސިލުން ބޭއްވި ތިލައުތުރު ރަންތާޖު ޤުރުއާން މުބާރާތް ނިންމުމަށް މިއަދު ހެނދުނު ހއ. އުތީމުގައި ހުންނަ ބޮޑުތަކުރުފާނުގެ ހަނދާނީ މަރުކަޒުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކައިގައެވެ.

ތިލައުތުރު ރަންތާޖު ޤުރުއާން މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވައި، މިނިސްޓަރު ވަނީ ދުނިޔޭގެ ތާރީޚުގައި ހިނގާފައިވާ މުހިންމު ހާދިސާއެއްގެތެރޭން ކީރިތި ޤުރުއާނުގެ މުހިންމު ކަމާއި ކީރިތި ޤުރުއާނުގެ މާތް ކަމުގެ މައްޗަށް ބައްލަވާލައްވާފައެވެ.

އެގޮތުން އެ މަނިކުފާނު ވިދާޅުވީ މީލާދީން 1250 ގެ ތެރޭގައި ފަރަންސޭސިވިލާތުން މިޞްރު ހިފުމަށްޓަކައި ކުރި މަސައްކަތް ނާކާމިޔާބުކޮށްލި ކަމަށެވެ. އަދި ސަލާމަތާ ރައްކާތެރިކަމަށްޓަކައި، މިސުރުން އެޅުއްވި ހަރުދަނާ ފިޔަވަޅުތަކެއް ނަތީޖާއެއްގެ ގޮތުން ފަރަންސޭސި ރަސްގެފާނު އަދި އިސް ކޮމާންޑަރ ލުއިސް (9) ހައްޔަރުކުރެއްވި ކަމަށް އެ މަނިކުފާނު ވިދާޅުވިއެވެ.

މި މޭރުމުން އެ މަނިކުފާނު މިއަދު އުތީމުގައި ދެއްކެވި ވާހަކަފުޅުގައި މި ހާދިސާއާ މެދު ފުންކޮށް ވިސްނާ ފިކުރުކުކުރުމަށް އިލްތިމާސްކުރެއްވިއެވެ.

އެމަނިކުފާނު ވަނީ މިހާ ބަރަކާތްތެރި އަދި މުޤައްދަސް މަސައްކަތެއް، ވަރަށް އޮގަނައިޒުކޮށް، އެހައިމެ ފުރިހަމައަށް ކުރައްވާފައި ވާތީ، މުބާރާތުގެ އިންތިޒާމުތައް ކުރައްވާ ބެލެހެއްޓެވި އުތީމު ކައުންސިލުގެ ރައީސަށާއި، އެ ކައުންސިލުގެ މެންބަރުންނަށް ހާއްސަކޮށް ހއ. އަތޮޅު ކައުންސިލުގެ ރައީސަށާއި، އަތޮޅު ކައުންސިލުގެ މެންބަރުންނަށް ޝުކުރު އަދާކުރައްވާފައެވެ. އަދި މި ޝުކުރުގައި މުބާރާތުގެ ތަފާތު ވަނަތައް ހޯދި ދަރިވަރުންނާއި، ރަށްތައް ޝާމިލްކުރެއްވިއެވެ.

ތިލައުތުރު ރަންތާޖު ޤުރުއާން މުބާރާތް - 2024ގެ ފަޚުރުވެރި 1 ވަނަ ހާސިލްކުރީ ދިއްދޫއެވެ. 2 ވަނަ ހޯދީ އިހަވަންދޫއެވެ. އަދި 3 ވަނަ ހޯދީ ހޯރަފުއްޓެވެ.

މިއީ ދިއްދޫ މި މުބާރާތް މެދުނުކެނޑި ކާމިޔާބުކުރި 3 ވަނަ ފަހަރެވެ.