ރައީސުލްޖުމްހޫރިއްޔާގެ ސިޔާސަތުތަކާ ކައުންސިލުތަކުން ކުރެވޭ މަސައްކަތްތައް އެއް ގޮތްވުމަކީ އަޅުގަނޑުމެން ވަރަށް ބޮޑަށް އުފާކުރަންޖެހޭ ކަމެއް ކަމުގައި މިނިސްޓަރ އާދަމް ޝަރީފު ޢުމަރު ވިދާޅުވެއްޖެއެވެ.

ށ. އަތޮޅުގެ ސުކޫލުތަކަށް ހުޅުވައިލައިގެން އެ އަތޮޅު ކައުންސިލުން ބޭއްވި ފުރަތަމަ ވާހަކަދެއްކުމުގެ މުބާރާތް ނިންމުމަށް ކަނޑިތީމުގައި ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަދައްކަވަމުން މިނިސްޓަރ ވަނީ ކައުންސިލުތަކުން މި ކުރާ މަސައްކަތްތައް ވަރަށް ބޮޑަށް ބަލައިގަންނަންކަން ފާހަގަކުރައްވާފައެވެ.

މިނިސްޓަރު ވިދާޅުވީ ދިވެހިބަހަށް ރައީސް ޑރ. މުޙައްމަދު މުޢިއްޒު ވަރަށް ބޮޑު އިސްކަމެއް ދެއްވާ ކަމަށާއި އެކަން ހާމަވަނީ ރާއްޖޭގެ ތާރީޚުގައި ފުރަތަމަ ފަހަރަށް ވުޒާރާތަކުގެ އިނގިރޭސި ނަމާއެކީގައި، ކިޔާނެ ދިވެހި ނަމެއް އާންމުކުރެއްވީ ރައިސް ކަމަށްވާތީ ކަމަށެވެ. އަދި ދިވެހިބަސް ދިރުވާ އާލާކުރުމަށް އެ މަނިކުފާނު ދެއްވާ އިސްކަމާ އަހައްމިއްޔަތު މިކަމުން އަންގައިދޭ ކަމަށް ވެސް ވިދާޅުވިއެވެ.

މިނިސްޓަރު އިތުރަށް ވިދާޅުވީ ދިވެހި ގައުމިއްޔަތުގެ އެންމެ މަތިވެރި އެއް ބަހާއަކީ ދިވެހިބަސް ކަމަށާއި ގައުމިއްޔަތެއް އެންމެ ފުރިހަމަ ގޮތުގައި ކުރިއަށް ގެންދެވޭނީ، ދިވެހިބަހަށް އަހުލުވެރިވެ، ފަރިތަވެ، ދިވެހިބަހުގެ ބޭނުން ހިފައިގެން، އަޅުގަނޑުމެންގެ މަސައްކަތްތަކައިގެން ކުރިއަށް ދެވޭނެ ބަޔަކު ތިބެގެން ކަމަށެވެ.

ދިވެހިބަސް ކުރިއަރުވާ ދިބެހިބަސް ކުރިއަށް ގެންދިއުމަށް ބޭއްވި މި މުބާރާތަށް، ދަރިވަރުން ތައްޔާރުކޮށްދެއްވުމަށް މުދައްރިސުން ކޮށްދެއްވައިފައިވާ މަސައްކަތުގެ ފެންވަރު ވަރަށް ރަނގަޅަށް ދަރިވަރުންގެ ވާހަކަތަކުން އެނގި ހާމަވެގެން ދިޔަ ކަމަށް ވެސް މިނިސްޓަރ ވިދާޅުވިއެވެ. އަދި އެ ދަރިވަރުންގެ ވާހަކަތަކުން، އެ ދަރިވަރުންގެ އަމިއްލަ ނަފުސަށް އޮންނަންޖެހޭ އިތުބާރާ ޔަގީންކަން އޮވެގެން ވާހަކަދެއްކި ކަން ފާހަގަކުރެވުނު ކަމަށް ވެސް ވިދާޅުވިއެވެ.