ކެއުމާ ބެހޭގޮތުން ވާހަކަ ދައްކާއިރު، ހަމަ ކޮންމެ މީހެއްގެ ކެއުމުގައި ތަފާތު އާދަތަކެއް ހުރެއެވެ. އަޅުގަނޑުމެންގެ ތެރެއިން ބައެއް މީހުން ދުވާލަކު ތިން ފަހަރު ކައިގެން އުޅެއެވެ. އަނެއްބައި މީހުން ދުވަހުގެ ތެރޭގައި ކުދިކުދި ލުއި ކެއުންތަކާއި ކާތަކެތި ބޭނުންކުރަން ބޭނުންވެއެވެ.

މީގެ އިތުރުން، އަޅުގަނޑުމެންގެ ދިރިއުޅުމުގެ ޒިންމާތަކާ ކުރިމަތިލާން ޖެހުމުގެ ސަބަބުން ކެއުމަށް އަސަރުކުރެއެވެ. ތިބާ ވަޒީފާގައި ބުރަކޮށް މަސައްކަތްކޮށް، ގެއަށް އައިސް ދަރިން ބަލަން ޖެހިދާނެއެވެ. އަދި ބައެއް ދުވަސްތަކުގައި ކެއުމަށް ކަނޑައެޅިފައިވާ ވަގުތު ތާވަލެއް އޮތްނަމަވެސް، އެއާއި އެއްގޮތަށް ކަންކަން ނުވެދާނެއެވެ.

މި ހާލަތްތަކުގެ ސަބަބުން އަޅުގަނޑުމެން ކައިބޮއި އުޅޭ ގޮތަށް އަސަރުކޮށް، ބައެއް ފަހަރު ކެއުމުގެ ރަނގަޅު ނޫން އާދަތަކަށް ދާން މަޖުބޫރުވެއެވެ. މީގެ ތެރޭގައި ނިދަން ގާތްވެފައި ވަނިކޮށް ކެއުމާއި، ކާން ޖެހޭ ވަގުތުތަކުގައި ނުކެއުމާއި، އަދި މާ އަވަސް އަވަހަށް ކެއުމާއި ވިސްނުމެއްނެތި ކެއުން ފަދަ އާދަތައް ގެންގުޅެވެއެވެ. މި އާދަތަކުގެ ސަބަބުން ތިބާގެ ސިއްހަތަށް ކުރާނެ އަސަރުތަކާއި، އެ އާދަތައް ބަދަލުކުރުމަށް ކުރެވިދާނެ ކަންތައްތަކާ ބެހޭގޮތުން ބަލާލަމާ ހިނގާށެވެ.

ނިދަން ގާތްވެފައި ވަނިކޮށް ކެއުން

ނިދަން އެހާ ގާތްވެފައި ވަނިކޮށް ކެއުމުގެ ސަބަބުން ތިބާއަށް ލިބޭ ނިދީގެ މިންވަރު މަދުވެ، ޤުދުރަތީ ނިދުމުގެ ދައުރަށް އަސަރުކުރެއެވެ. މިކަމުގެ ސަބަބުން ބޭނުންނުވާ ގޮތަށް ހަށިގަނޑުގެ ބަރުދަން އިތުރުވުމާއި، ލޭގެ ޕްރެޝަރ މައްޗަށް ދިއުމާއި، ހިތުގެ ބަލިތަކަށް މަގުފަހިވުމުގެ ފުރުސަތު އޮވެއެވެ. ޖާނަލް އޮފް ކްލިނިކަލް ސްލީޕް މެޑިސިންގައި (2011) ވަނަ އަހަރު ޝާއިޢުކުރެވުނު ދިރާސާއިން ދައްކާގޮތުން

ރޭގަނޑުގެ ފަހު ވަގުތުތަކުގައި ގިނަ ކެލެރީ ހުންނަ ކާނާ ކެއުމުގެ ސަބަބުން ނިދުމުގެ ފެންވަރު ދަށްވެ، ހަށިގަނޑުގެ ބަރުދަން އިތުރުވުމަށް މަގުފަހިވެ އަދި ފަލަވުމާއި މެޓަބޮލިކް ބަލިތަކަށް ހުށަހެޅުމުގެ ފުރުސަތު އިތުރުވެގެންދެއެވެ.

އެހެންކަމުން ތިބާގެ ދުވަހުގެ ވަގުތު ތާވަލުގެ ސަބަބުން ނިދަން ގާތްވެފައި ވަނިކޮށް ކާން ތައްޔާރުކުރަން ޖެހޭނަމަ، އަވަހަށް ކާއެއްޗެހި ތައްޔާރުކުރެވޭނެ ރެސިޕީތައް ހޯދާށެވެ. މިސާލަކަށް ކުރިން ބޭނުންކޮށްފައި ހުންނަ ތަރުކާރީ ނުވަތަ ފްރީޒްކޮށްފައި ހުންނަ ނުވަތަ ކައްކާފައިވާ ހުންނަ ބަތް، ރޮށި ފަދަ ތަކެތި ބޭނުންކުރުމުން ކާ ތައްޔާރުކުރުމަށް ހޭދަވާ ވަގުތު މަދުކުރެވިދާނެއެވެ. އަދި ރޭގަނޑުގެ ކެއުމަށްފަހު އަނެއްކާވެސް ބަނޑުހައިވާނަމަ، ލުއި އެއްޗެއް ކާށެވެ. މިސާލަކަށް ޔޯގަޓެއް ނުވަތަ މޭވާއެއް ކެއުން ރަނގަޅުވާނެއެވެ. އަދި ނިދަން އޮށޯތުމުގެ 2 ގަޑިއިރު ނުވަތަ 3 ގަޑިއިރު ކުރިން ފުރިހަމަ ކެއުމެއް ނުކެވޭނަމަ އަދި ނިދަން ގާތްވެފައި ވަނިކޮށް ކާން ޖެހޭނަމަ، ކުޑަ ލުއި އެއްޗެއް ކެއުމަށް މަސައްކަތްކުރާށެވެ.

ކާން ޖެހޭ ވަގުތުތަކުގައި ނުކެއުން

ކާން ޖެހޭ ވަގުތުތަކުގައި ނުކެއުމުގެ ސަބަބުން ލޭގައި ހުންނަ ހަކުރުގެ މިންވަރު ދަށްވެ، ތިބާގެ މޫޑަށް އަސަރުކުރެއެވެ. މީގެ ސަބަބުން ވަރުބަލިކަން އިހުސާސްކުރެވުމާއި، ސަމާލުކަން ދިނުމަށް އުނދަގޫވުމާއި، އަދި ފަސޭހައިން ރުޅިއައުން ފަދަ ކަންކަން ދިމާވެދާނެއެވެ. މީގެ އިތުރުން، ދެން ކާ ކެއުމުގައި މާގިނައިން ކެއުމަށް މަގުފަހިވެ، ބަނޑުހައިވުމުގެ ސަބަބުން މޭވާއާއި ހަކުރު ގިނަ ކާނާއަށް ކެއުމަށް ދެވިހިފުމުގެ ފުރުސަތު ފަހިވެގެންދެއެވެ. ނިއުޓްރިއެންޓްސް ޖާނަލް (2020) ގައި މަރިއާނާ ޑެލް ކަރްމެން ބޯރްޓޮލިން އާއި އޭނާގެ އެކުވެރިން ޝާއިޢުކުރި ކެއުމުގެ އާދަތަކާއި ގުޅޭ ދިރާސާއިން ދައްކާގޮތުގައި ކެއުން ފަސްކުރުމާއި ކެއުމުގެ ވަގުތުތަކަށް ބަދަލުގެނައުމުގެ ސަބަބުން ހަށިގަނޑުގެ ސާކޭޑިއަން ރިދަމްތަކަށް އަސަރުކޮށް، ލޭގައި ހުންނަ ހަކުރުގެ މިންވަރަށާއި މޫޑަށް ނޭދެވޭ އަސަރުކުރާކަން ފާހަގަވެފައިވެއެވެ.

މީގެ ބަދަލުގައި ކޮންމެ ދުވަހަކު ކާން ތައްޔާރުކުރަން ވަގުތު ނެތްނަމަ، ކުރިއާލައި ކާނެ އެއްޗެއް ޕްލޭންކުރުން ބޭނުންތެރިއެވެ. މިގޮތުން މުޅި ހަފްތާއަށް ވާވަރަށް އެއް ދުވަހެއްގައި ކާނާ ތައްޔާރުކުރާކަށް ނުޖެހެއެވެ. ކުރިން ބޭނުންކޮށްފައި ހުންނަ ތަރުކާރީ ނުވަތަ ފްރީޒްކޮށްފައި ހުންނަ ތަރުކާރީ ބޭނުންކުރުމުން ކާ ތައްޔާރުކޮށް ކެއްކުމަށް ހޭދަވާ ވަގުތު މަދުކުރެވިދާނެއެވެ. ފުރިހަމަ ކެއުމަކަށް ވަގުތު ނެތްނަމަ، ދެންއޮތް އޮޕްޝަނަކީ ނިއުޓްރިޝަން ސަޕްލިމެންޓެއް ނުވަތަ ދުވަހުގެ ތެރޭގައި ތަފާތު ކުދި ލުއި ކާތަކެތި ކެއުމެވެ. މީގެ ތެރޭގައި އާފަލެއް އަދި ޕީނަޓް ބަޓަރ، ނުވަތަ ތަރުކާރީ، ސްޓްރިންގ ޗީޒް، ބިސްގަނޑަކާއެކު ކެރެޓް، ނުވަތަ ޔޯގަޓާއި ބެރީޒް ހިމެނިދާނެއެވެ.

އަވަސް އަވަހަށް ކެއުން

އަވަސް އަވަހަށް ކެއުމުގެ ސަބަބުން ބަނޑު ފުރުނުކަން އެނގުމަށް އުނދަގޫވެއެވެ. މީގެ ސަބަބުން ގިނައިން ކެއުމާއި، ހަޖަމު ނުވުމާއި، ހަޖަމުކުރުމުގެ ނިޒާމަށް އުނދަގޫވުމާއި އަދި ބޭނުންނުވާ ގޮތަށް ހަށިގަނޑުގެ ބަރުދަން އިތުރުވުމަށް މަގުފަހިވެއެވެ.

"ޖާނަލް އޮފް ދަ އެކަޑެމީ އޮފް ނިއުޓްރިޝަން އެންޑް ޑައިޓެޓިކްސް" ގައި 2011 ވަނަ އަހަރު ޖޯއެން އެލެގްޒެންޑަރ އާއި އޭނާގެ އެކުވެރިން ޝާއިޢުކުރި "އީޓިންގ ސްލޯލީ ޑިކްރީސަސް އެނާރޖީ އިންޓޭކް އެންޑް އިންކްރީސަސް ވޯޓަރ ކޮންސަމްޕްޝަން އިން ނޯމަލް-ވެއިޓް ވިމެން" މި ދިރާސާއިން ދައްކާގޮތުގައި އަވަސް އަވަހަށް ކެއުމުގެ ސަބަބުން ބަނޑު ފުރުނުކަން އެނގުމަށް އުނދަގޫވެ، ގިނައިން ކެއުމާއި، ހަޖަމު ނުވުމާއި، ހަޖަމުކުރުމުގެ ނިޒާމަށް އުނދަގޫވުމާއި އަދި ބޭނުންނުވާ ގޮތަށް ހަށިގަނޑުގެ ބަރުދަން އިތުރުވުމަށް މަގުފަހިވާއިރު، ލަސްލަހުން ކެއުމަކީ މި މައްސަލަތައް ޙައްލުކުރުމަށް އެހީތެރިވެދޭ ކަމެއްކަން ފާހަގަކޮށްފައިވެއެވެ.

މީގެ ބަދަލުގައި ކުދި ތަށިތަށްޓާއި ސަމުސާ ބޭނުންކޮށްގެން ކުދި ބައިތަކަށް ބަހާލައިގެން ކެއުމާއި، ކޮންމެ ފަހަރަކު އެއްޗެއް ކައިފިނަމަ ތަށި ނުވަތަ ސަމުސާ ބެހެއްޓުން ފަދަ އާދަތައް ގެންގުޅެވިދާނެއެވެ. އަދި ކެއުމުގެ ތެރޭގައި ފެން، ސްޕާކްލިންގ ވޯޓަރ، ނުވަތަ ހަކުރު ނުލާ ސައެއްފަދަ ކެލަރީ ނުހުންނަ ބުއިމެއް ބޭނުން ކުރެވިދާނެއެވެ. އަދި ވީވަރަކުން އެހެން މީހުންނާއެކު ކެއުމާއި، ހަމަޖެހިލައިގެން އިނދެ ވާހަކަ ދައްކަމުން ކެއުމުގެ މިންވަރު ލަސްކުރެވިދާނެއެވެ.

ވިސްނުމެއް ނެތި ކެއުން

ވިސްނުމެއް ނެތި ކެއުމުގެ ސަބަބުން ގިނައިން ކެއުމާއި ބޭނުންނުވާ ގޮތަށް ހަށިގަނޑުގެ ބަރުދަން އިތުރުވުމަށް މަގުފަހިވެއެވެ. އަދި މިއީ ނަފްސާނީ ގޮތުން ބޮޑު ޕްރެޝަރެއްގައި ހުރިކަން ނުވަތަ އެހެން ނަފްސާނީ މައްސަލައެއް ހުރިކަމުގެ ނިޝާނަކަށްވެސް ވެދާނެއެވެ. މީގެ ބަދަލުގައި ޓީވީ ކުރިމަތީގައި ކާނަމަ އޭގެ ބަދަލުގައި، ބަދިގެ މޭޒުދޮށުގައި ނުވަތަ އެފަދަ ވަކި ޚާއްޞަ ތަނެއްގައި ކެއުމަށް އާދަކުރެވިދާނެއެވެ. އަދި ކާއިރު ކާއެއްޗެހީގެ ވަސް، ރަހަ، އެނގުމުން ކެއުމުގެ ތެރޭގައި ލިބޭ އިހުސާސްތަކަށް ސަމާލުކަން ދިނުމަށް މަސައްކަތްކުރާށެވެ.

މައުލޫމާތު: ހެލްތް.ޔޫސީޑޭވިސް އީޑީޔޫ ބްލޮގް.