އެއަރ އަރަބިއާގެ ދަތުރުތައް ފުރަތަމަފަހަރަށް ރާއްޖެއަށް ފަށައިފިއެވެ.

މެދުއިރުމައްޗާއި އުތުރު އެފްރިކާގެ ފުރަތަމަ އަދި އެންމެ ބޮޑު، ލޯ ކޯސްޓް އެއަރލައިން އޮޕަރޭޓަރގެ މި ދަތުރުތައް ކުރާނީ ޝާރްޖާ އިންޓަރނޭޝަނަލް އެއަރޕޯޓުން ރާއްޖޭގެ ވެލާނާ އިންޓަރނޭޝަނަލް އެއަރޕޯޓަށެވެ.

މި އެއަރލައިންގެ ދަތުރުތައް ރާއްޖެއަށް ފެށުމުގޮތުން ވީއައިއޭ އިން ވަނީ ފުރަތަމަ ފްލައިޓަށް ވޯޓަރ ސެލިއުޓެއް ދީފައެވެ.

މި ދަތުރުތައް ކޮންމެ ދުވަހަކު ވެސް ތާވަލުކޮށްފައިވާއިރު، ދުވާލަކު އެއް ފްލައިޓު ދަތުރުކުރާނެއެވެ. އެގޮތުން ރާއްޖެއިން ޝާރްޖާއަށް ފުރާ ފްލައިޓުގެ މެންދުރުފަހު 2:20 ގައި ފުރުމަށް ނިންމާފައިވާއިރު، ޝާރްޖާއިން ރާއްޖެއަށް ފުރާނީ ހެނދުނު 8 ޖަހާއިރުއެވެ. މިދަތުރުތަކުގައި ބޭނުންކުރާނީ އެއަރބަސް އޭ 380 މަރުކާގެ މަތިންދާބޯޓެވެ.

އެމްއޭސީއެލްގެ ސީއީއޯ އަދި މެނޭޖިންގ ޑިރެކްޓަރ އިބްރާޙީމް ޝަރީފް މުޙައްމަދު ވިދާޅުވީ މި ޕާޓްނަރޝިޕްގެ ސަބަބުން ވެލާނާ އިންޓަރނޭޝަނަލް އެއަރޕޯޓަށް ލިބޭ ފުރުސަތުތަކާމެދު ވަރަށް ބޮޑަށް އުފާކުރައްވާ ކަމަށެވެ.

"ޝާރްޖާއާ ސީދާ ގުޅުމުގެ ސަބަބުން މެދުއިރުމަތީގެ މާކެޓުން އަންނަ ފަތުރުވެރިން އިތުރުވެ، ދުނިޔޭގެ ގިނަ ސިޓީތަކަކަށް ކަނެކްޝަން ފުޅާވެގެންދާނެ. ފަތުރުވެރިކަމުގެ ދާއިރާއަށް ހާއްސަ ސަމާލުކަމެއް ދީގެން، ރާއްޖޭގެ ރަށްރަށުގެ ރީތިކަން ދެނެގަންނަން ބޭނުންވާ ފަރާތްތަކަށް ހެޔޮ އަގުގަ އަދި ހުއްޓުމެއްނެތި ވައިގެ ދަތުރުފަތުރު ކުރެވޭނެ މަގު ވެސް ހުޅުވިގެންދާނެ." ޝަރީފް ވިދާޅުވިއެވެ.

އެއަރ އަރަބިޔާގެ ވެބްސައިޓުންނާއި ޓްރެވަލް އެޖެންސީތައް މެދުވެރިކޮށް ވެސް މި ދަތުރުތައް ބުކް ކުރެވޭނެ އިންތިޒާމު މިހާރުވަނީ ހަމަޖައްސާފައެވެ.