ރީތިކޮށް ޤުރްއާން ތިލާވަތުކުރުމަށް ބޭނުންވާ ހުނަރުވެރިކަމާއި ފަންނުވެރިކަން ދަސްކޮށްދިނުމުގެ 1 ދުވަހުގެ ވޯކްޝޮޕެއް ބޭއްވުމަށް ނިންމާ ބައިވެރިވުމަށް އިއުލާންކޮށްފިއެވެ.

މިއީ ދިވެހިރާއްޖޭގެ އިސްލާމީ ޔުނިވަރސިޓީން އިންތިޒާމުކޮށްގެން ބޭރުގެ ޤާރީންގެ އެހީތެރިކަމާއެކު ކީރިތި ޤުރްއާން އުނގަންނައިދޭ މުދައްރިސުންނަށް އަމާޒުކޮށްގެން ކުރިއަށްގެންދާ ވޯކްޝޮޕެކެވެ.

އަންނަ ނޮވެމްބަރު މަހުގެ 2 ވަނަ ދުވަހުގެ މެންދުރު 1 ން މެންދުރުފަހު 3 އަށް ބޭއްވުމަށް ޝެޑިއުލްކޮށްފައިވާ މި ވޯކްޝޮޕް އޮންނާނީ ދިވެހިރާއްޖޭގެ އިސްލާމީ ޔުނިވަރސިޓީގެ ހޯލުގައެވެ. މި ވޯކްޝޮޕްގައި 120 ފަރާތަކަށް ފުރުޞަތު ދިނުމަށް ނިންމާފައިވާކަމަށް އައިޔޫއެމް ހާމަކޮށްފައިވެއެވެ.

މިވޯކްޝޮޕްގައި ބައިވެރިވާ ބޭރުގެ ޤާރީންގެތެރޭގައި ޑރ. ޖުމްޢާ ޙަމްދީ ސާލިމް އާއި ޑރ. މުޙައްމަދު މަސްޢޫދު ޢުލްވާނީ އާއި އަދި އައްޝެއިޚްލް މުޤްރިއު އަޙްމަދު ލާޝީން ހިމެނި ވަޑައިގަންނަވައެވެ.

"މަޙްފިލް ޤުރްއާނީ" ވޯކްޝޮޕަކީ 2021 ވަނަ އަހަރުން ފެށިގެން ކޮންމެ އަހަރަކު ޤުރްއާން ކިޔަވައިދެއްވާ މުދައްރިސުންނާއި ޤުރްއާނުގެ ދާއިރާއިން މަތީ ތަޢްލީމު ޙާޞިލުކުރައްވަމުންދާ ފަރާތްތަކަށް އަމާޒުކޮށްގެން ދިވެހިރާއްޖޭގެ އިސްލާމިކް ޔުނިވަރސިޓީގެ ކުއްލިއްޔާ އޮފް ޤުރްއާން އެންޑް ސުންނާގެ ފަރާތުން އިންތިޒާމުކޮށްގެން ކުރިއަށްގެންދާ ޤުރުއާނުގެ މަޙްފިލްތަކެކެވެ.

މިއީ މިގޮތުން ބާއްވާ 4 ވަނަ ޤްރްއާނީ މަޙްފިލްކަމަށް އިސްލާމީ ޔުނިވަރސިޓީއިން މައުލޫމާތު ދެއްވައެވެ.

މި ވޯކްޝޮޕްގައި ބައިވެރިވުމުގެ ފުރުޞަތު މިހިނގާ އޮކްޓޯބަރ މަހުގެ 28 ވަނަ ދުވަހުގެ ރޭ 11:59 ގެ ކުރިންވަނީ ހުޅުވާލައިފައެވެ. އަދި މިވޯކްޝޮޕްގައި ބައިވެރިވާން އެދޭ ޤުރްއާން މުދައްރިސުންނާއި ޤުރްއާނުގެ ދާއިރާގައި މަސައްކަތް ކުރާއްވާ ފަރާތްތަކުން ތިރީގައިވާ ގޫގަލް ފޯމް މެދުވެރިކޮށް މި ވޯކްޝޮޕްގައި ބައިވެރިވެވޭނެއެވެ.