ރާއްޖޭގެ މުވާސަލާތީ ހިދުމަތުގައި އެންމެގިނަދުވަސްވީ އަދި އެންމެބޮޑު ކުންފުނި ދިރާގުން "ނެޓް ޕްރޮޓެކްޓް" ތައާރަފުކޮށްފިއެވެ.

އެ ކުންފުނިން ވިދާޅުވީ މިއީ ސައިބަރ އެޓޭކްތަކުންނާއި ރައްކާތެރި ނޫން ލިންކުތަކުން ސަލާމަތްކުރުމަށް ތައާރަފްކުރި ހިދުމަތެއް ކަމަށެވެ. އަދި މިއީ ސްކޭމް އީމެއިލްތަކާއި ރަނގަޅު ނޫން ވެބްސައިޓްތަކުން ރައްކާތެރިކަން ފޯރުކޮށްދޭނެ ހިދުމަތެއް ކަމުގައި ވެސް ވިދާޅުވިއެވެ.

"މިއިން އެ ވެބްސައިޓް ނުވަތަ އެ ލިންކަކީ ރައްކާތެރި ލިންކެއް ނޫންނަމަ، އެކަން ކަސްޓަމަރުންނަށް އަންގާނެ. ކަސްޓަމަރުން ބޭނުންވާނަމަ، ވަކި ކަހަލަ ވެބްސައިޓްތައް ބްލޮކް ވެސް ކުރެވޭނެ." ދިރާގުން ވިދާޅުވިއެވެ.

މީގެއިތުރުން ވަކި ވަގުތުތަކުގައި ވަކި ވެބްސައިޓްތަކަށް ނުވަތަ އެޕްތަކަށް ނުވަދެވޭ ގޮތް ވެސް ހެދޭ މި ހިދުމަތުގައި ކުޑަކުދިންނަށް ފެންނަން ބޭނުންނުވާ ފަދަ އެކި ވެބްސައިޓުތައް ވަކިން ބްލޮކް ކުރެވޭނެ ކަމަށް ވެސް ވަނީ ހާމަކުރައްވާފައެވެ.

ނެޓް ޕްރޮޓެކް ކަސްޓަމައިޒް ކުރެވޭނީ ޕްރޮޓެކްޓް ޕޯޓަލުން ކަމަށާއި މި ހިދުމަތް މޮބައިލް އިންޓަރނެޓާއި ފިކްސްޑް ބްރޯޑްބޭންޑަށް ވެސް ލިބޭނެކަމަށް ވިދާޅުވިއެވެ.

މި ހިދުމަތް ދިނުމުގެ އަގާއި ގުޅޭގޮތުން ދިރާގުން ވިދާޅުވީ 30 ދުވަހަށް ހިލޭ ހިދުމަތް ލިބޭނެ ކަމަށާއި އެ ކުންފުނީގެ ޕޭރަންޓަލް ކޮންޓްރޯލް ސަރވިސް ނަގާފައިވާ ފަރާތްތައް ނެޓް ޕްރޮޓެކްޓް އަށް ބަދަލުކޮށްފައިވާ ކަމަށެވެ. އަދި އެ ފަރާތްތަކަށް 50 އިންސައްތައިގެ ޑިސްކައުންޓެއް މުޅި އަހަރު ދުވަހަށް ލިބޭނެ ކަމަށެވެ.

ދިރާގުން އިތުރަށް ވިދާޅުވީ މި ހިދުމަތް އެކްޓިވޭޓްކޮށް ބޭނުންކުރުމަށް މޮބައިލް ކަސްޓަމަރުން މަހަކު 35 ރުފިޔާ އަދި ފިކްސްޑް ބްރޯޑްބޭންޑް ކަސްޓަމަރުން މަހަކު 50 ރުފިޔާ ދައްކަން ޖެހޭ ކަމަށެވެ.