ބޭންކް އޮފް މޯލްޑިވްސް (ބީއެމްއެލް) އިން އަރިއަތޮޅު އުތުރުބުރީގެ އިތުރު ދެރަށެއްގައި ސެލްފް ސަރވިސް ބޭންކިންގ އޭޓީއެމްގެ ހިދުމަތް ދޭން ފަށައިފިއެވެ.

މުޅި ރާއްޖެއަށް ބޭންކިންގ ހިދުމަތް ފުޅާ ކުރުމަށް ކުރަމުންދާ މަސައްކަތުގެ ދަށުން އޭޓީއެމް ބަހައްޓާފައިވަނީ އއ. ފެރިދޫ އާއި ބޮޑުފޮޅުދޫގައެވެ.

މި އޭޓީމީއެމް ސެންޓަރު މެދުވެރިކޮށް އަމިއްލަ ފަރުދުންނާއި ވިޔަފާރިތަކަށް 24 ގަޑިއިރު ފައިސާ ނެގުމާއި ފައިސާ ޖަމާ ކުރުމާއި ބިލަށް ފައިސާ ދެއްކުމާއި ޓްރާންސްފަރ ކުރުމުގެ ހިދުމަތް ލިބޭނެ ކަމަށް ބީއެމްއެލް އިން ހާމަކުރައްވައެވެ.

އެ އަތޮޅުގައި މިހާރު 6 ސެލްފް ސަރވިސް ބޭންކިންގ އޭޓީއެމް ސެންޓަރެއް ގާއިމުކުރެވިފައިވާއިރު، ރަސްދޫގައި މި ހިދުމަތް 2006 ވަނަ އަހަރުން ފެށިގެން އަންނަނީ ދެމުންނެވެ.

މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 39 ބްރާންޗް، 89 ސެލްފް ސަރވިސް ބޭންކިންގ ސެންޓަރ އާއި 144 އޭޓީއެމް މިހާރު ގާއިމްކޮށް އަންނަނީ ހިދުމަތް ފޯރުކޮށް ދެމުންނެވެ.

މީގެއިތުރުން ކޭޝް އޭޖެންޓުގެ ހިދުމަތާއި އެންމެ ޒަމާނީ އޮންލައިން ބޭންކިންގ ހިދުމަތާއެކު ބީއެމްއެލް އަމާޒު ހިފާފައިވަނީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށް ދިނުމަށެވެ.