ފެނަކަ ކޯޕަރޭޝަންގެ ކުރީގެ މެނޭޖިންގ ޑިރެކްޓަރ އަހްމަދު ސައީދުގެ ޕާސްޕޯޓު ހިފަހައްޓައިފިއެވެ.

މައުލޫމާތު ލިބިފައިވާ ގޮތުގައި އެންޓި ކޮރަޕްޝަން ކޮމިޝަނުން ބަލަމުންދާ މައްސަލައަކާ ގުޅިގެން އޭނާގެ ޕާސްޕޯޓު ހިފަހައްޓާފައިވަނީ އޮކްޓޯބަރ 9 ވަނަ ދުވަހުއެވެ.

އެމްޑީޕީ ސަރުކާރުން ފެނަކައިގެ އެމްޑީގެ މަގާމު އަދާކުރައްވާފައިވާ ސައީދުއަށް ވަނީ ކޮރަޕްޝަންގެ ގިނަ ތުހުމަތުތަކެއް އަމާޒުވެފައެވެ.

އެގޮތުން ކޮރަޕްޝަނަށް މަގުފަހިވާގޮތަށް ހަވާލުކޮށްފައިހުރި 25 މަޝްރޫއެއްގެ މައްސަލަ އޭސިސީ އަށް މި ސަރުކާރުން ވަނީ ހުށަހަޅާފައެވެ. އަދި ވަކި ބަޔަކަށް ފައިދާ ވާގޮތަށް ފެނަކައިން މަޝްރޫއުތައް ހަވާލުކޮށްފައިވާކަމަށް ބުނެ ސައީދުގެ މައްޗަށް ވެސް ވަނީ ގިނަ ތުހުމަތުތަކެއް ކޮށްފައެވެ.

މި ސަރުކާރުން ވެރިކަމާ ހަވާލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ފެނަކައިގެ މިހާރުގެ މެނޭޖިންގ ޑިރެކްޓަރު، މުއާޒް މުހައްމަދު ރަޝީދު ވިދާޅުވެފައިވަނީ އެ ކުންފުނީގެ ހާލަތު ވަރަށް ދަށްވެފައިވާ ކަމަށާއި މިހާރު އޮތް ހާލަތުން އޮޕަރޭޝަންގެ ކަންތައްތަކަށް ވެސް ބުރޫ އަރާފަދަ ދަރަޖައަށް ވެއްޓިފައިވާ ކަމަށެވެ.

އެގޮތުން 871 މިލިއަން ރުފިޔާ އަށް ދަރަނި އަރާ ކަމަށް ވެސް ވަނީ ވިދާޅުވެފައެވެ.

އެކިފަރާތްތަކަށް ދޭންޖެހޭ ފައިސާގެ ގޮތުގައި 3.2 ބިލިއަން ރުފިޔާ [ޖުމްލަ 4.16 ބިލިއަން ރުފިޔާ] ދަރަނީގެ ގޮތުގައި ދައްކަންޖެހޭ ކަމަށް މުއާޒް ވަނީ ވިދާޅުވެފައެވެ.

މި ތުހުމަތުތަކާއި ގުޅިގެން މީގެކުރީން، ސައީދު ވަނީ އޭނާއަށް ކުރާ ތުހުމަތުތަކަށް އިންކާރުކުރައްވާފައެވެ.