އާރްޓީއެލް ފެރީގެ ހިދުމަތުން މިހާރުނަގަމުން އަންނަ އަގަށް ބަދަލު ގެނައުމުގެ ވިސްނުންފުޅެއް ގެންގުޅުއްވާކަމުގެ އިޝާރާތެއް ޓްރާންސްޕޯޓު މިނިސްޓަރ މުހައްމަދު އަމީން ކުރައްވައިފިއެވެ.

ރައްޔިތުންގެ މަޖިލީހުގެ އިގްތިސާދީ ކޮމިޓީގައި ވާހަކަ ދައްކަވަމުން މިނިސްޓަރ ވަނީ ދެމެހެއްޓެނެވި ގޮތެެއްގައި ކުރިޔަށް ގެންދިޔުމަށްޓަކަައި އެ ހިދުމަތުގެ އަގު ބޮޑުކުރަން ޖެހޭކަން ފާހަގަކުރައްވާފައެވެ.

މިނިސްޓަރ ވިދާޅުވީ އާރްޓީއެލް ހިދުމަތް މިހާރު ހުރި އަގުތަކުގައި ކުރިއަށްގެންދަނީ ސަރުކާރުން ވަރަށްބޮޑު ސަބްސިޑީ އެއް ދީގެން ކަމަށެވެ. އަދި މިހާރުކުރިއަށްގެންދާގޮތަށް އެ ހިދުމަތް ދިގު މުއްދަތުގައި ކުރިއަށް ގެންދިއުމަކީ ދަތި ކަމެއްކަމުގައި ފާހަގަކުރެއްވިއެވެ.

މީގެއިތުރުން މިހާރުގެ އަގުތަކުގައި އެ ހިދުމަތް ދިނުމަށް އާރޓީއެލް ހިމަތް ފެށިއަހަރުވެސް ސަބްސިޑީގެ ގޮތުގައި 48 މިލިއަން ރުފިޔާ، މިދިޔަ އަހަރު 130 މިލިއަން ރުފިޔާ، އަދި މިއަހަރު 280 މިލިއަން ރުފިޔާ ސަބްސިޑީގެ ގޮތުގައި ސަރުކާރުން ދޭން ޖެހޭނެ ކަމަށް މިނިސްޓަރު ވިދާޅުވިއެވެ.

އެހެންކަމުން ސަރުކާރުން މަސައްކަތް ކުރަނީ ސަބްސިޑީ 50 އިންސަ ކުޑަކޮށްފަ، ރިކަވަރީ 45 އިންސައްތަ އަށް ހެދުމަށް ކަމަށް ވިދާޅުވިއެވެ. އަދި އެގޮތަށް އެކަން ކޮށްގެންނޫނީ އެ ހިދުމަތް ސަސްޓައިން ނުކުރެވޭނެ ކަމަށް ވެސް ވަނީ ވިދާޅުވެފައެވެ.

މިނިސްޓަރު އިތުރަށް ވިދާޅުވީ އާރޓީއެލް އިން މިހާރު ނަގާ އަގުތައް ބަދަލުކުރަން އިކޮނޮމިކު ކައުންސިލަށް ހުށަހަޅާފައިވާ ކަމަށެވެ.