މޮބައިލް ހިދުމަތްތަކުގެ އާމްދަނީ އާއެކު ދިރާގަށް 3 ވަނަ ކްއާޓަރގައި 691 މިލިއަން ރުފިޔާ ލިބިފައިވާކަމަށް މާލީ ހިސާބުތަކުން ދައްކައިފިއެވެ.

އެ ކުންފުނީގެ ހިސާބުތަކުން ދައްކާގޮތުގައި މިއީ ކުރީގެ ކްއާޓަރ އާ އަޅާބަލާއިރު، 0.6 އިންސައްތައިގެ އިތުރުވުމެކެވެ. މިއަހަރުގެ ދެވަނަ ކްއާޓަރގައި ދިރާގަށް ލިބިފައިވަނީ 687 މިލިޔަން ރުފިޔާއެވެ.

ރާއްޖޭގެ މުވާސަލާތީ ހިދުމަތުގެ އެންމެބޮޑޫ ކުންފުނިން ހާމަކުރައްވާފައިވާ ގޮތުގައި ތިންވަނަ ކްއާޓަރގައި މޯބައިލް ހިދުމަތްތަކުގެ އާމްދަނީގެ ގޮތުގައި 363 މިލިޔަން ރުފިޔާ ވަނީ ލިބިފައެވެ. އަދި ފިކްސްޑް ބްރޯޑްބޭންޑާއި އެންޓަރޕްރައިސްގެ ދާއިރާއިން 307 މިލިޔަން ރުފިޔާ ލިބިފައި ވެއެވެ.

މީގެއިތުރުން އެހެނިހެން ދާއިރާތަކުން 21 މިލިޔަން ރުފިޔާ ލިބިފައިވާކަމަށް ދައްކައެވެ.

ދިރާގުން ވިދާޅުވީ ތިންވަނަ ކުއާޓަރގައި ޓެކްސްއަށް ކެނޑުމުގެ ކުރިން 282 މިލިޔަން ރުފިޔާ ލިބިފައިވާ ކަމަށާއި ދެވަނަ ކުއާޓަރގައި މި އަދަދު ހުރީ 277 މިލިޔަން ރުފިޔާގައި ކަމަށެވެ.

ޓެކްސްއަށް ކެނޑުމަށްފަހު ތިންވަނަ ކުއާޓަރގައި ސާފު ފައިދާގެ ގޮތުގައި 241 މިލިޔަން ރުފިޔާ ލިބިފައިވާއިރު، ދެވަނަ ކުއާޓަރގައި ސާފު ފައިދާގެ ގޮތުގައި ލިބިފައިވަނީ 240 މިލިޔަން ރުފިޔާކަމަށް ދިރާގުގެ މާލީ ހިސާބުތަކުން ވަނީ ދައްކާފައެވެ.