މޯލްޑިވްސް ފައިންޑަރގެ 2025 ވަނަ އަހަރުގެ އަދަދު ރަސްމީކޮށް ނެރެފިއެވެ.

މިއީ މޯލްޑިވްސް އެސޯސިއޭޝަން އޮފް ޓްރެވަލް އޭޖެންޓްސް އެންޑް ޓުއަރ އޮޕަރޭޓަރސް (މަޓާޓޯ) އިން ކޮންމެއަހަރަކު ވެސް ނެރެމުން އަންނަ މަޖައްލާއެކެވެ.

ލަންޑަނުގައި ބޭއްވި ވޯލްޑް ޓްރެވަލް މާކެޓް (ޑަބްލިއުޓީއެމް) ގައި އަންނައަހަރުގެ މި މަޖައްލާ ނެރެދެއްވީ ޓޫރިޒަމް މިނިސްޓަރ އިބްރާހިމް ފައިސަލް އެވެ.

މި މަޖައްލާ އިން ރާއްޖެއަށް ޒިޔާރަތްކޮށް ތަންތަން ބަލައި ހަދާނެ ގޮތުގެ ފުރިހަމަ މައުލޫމާތު ލިބެންހުންނާނެއެވެ.

އެގޮތުން ދުނިޔޭގެ ފެންވަރުގެ ކެއުންބުއިމާއި، ފޮޓޯގްރަފީއާއި، މުއްސަނދި ސަގާފަތާއި ގުޅޭ މައުލޫމާތު ލިބޭނެއެވެ. އަދި ރާއްޖޭގެ ރީތި މަންޒަރުތައް ވެސް މި މަޖައްލާގައި ވަނީ ހިމަނާފައެވެ.

މީގެއިތުރުން ފާހަގަކޮށްލެވޭ ޝަހްސިއްޔަތުތަކާއި ރާއްޖޭގެ ހުނަރުވެރިންނާއި ރާއްޖޭގެ ވަކި ތަންތަނުގެ މައުލޫމާތާއި ދަތުރުވެރިންނަށް ބޭނުންތެރި އެތައް މައުލޫމާތުތަކެއް ވެސް ހިމަނާފައިވެއެވެ.

ދަތުރުފަތުރާއި ފަތުރުވެރިކަމުގެ ދާއިރާގެ އެންމެ ބޮޑު އެއް ބައްދަލުވުން ކަމަށްވާ ޑަބްލިއުޓީއެމްގައި ދުނިޔޭގެ އެކި ކަންކޮޅުތަކުން 3،000 އަށް ވުރެ ގިނަ މީޑިއާ މަންދޫބުން ބައިވެރިވެއެވެ.

މިއީ ބައިނަލްއަގްވާމީ ފެންވަރުގައި މޯލްޑިވްސް ފައިންޑަރ އިޝްތިހާރުކުރުމަށް ލިބޭ ވަރަށް މުހިންމު ފުރުސަތެކެވެ. މިކަމުގެ ސަބަބުން މި މަޖައްލާ ދުނިޔޭގެ އެކި ކަންކޮޅުތަކުގައި ތިބި ދަތުރުފަތުރުގެ ދާއިރާގެ ޕްރޮފެޝަނަލުންނާއި ޝައުގުވެރިވާ ފަރާތްތަކަށް ފޯރުކޮށްދެވޭނެއެވެ.