އާރުޑީސީގެ ސްޓްރެޖެޓިކް އެކްޝަން ޕްލޭން އިފްތިތާހުކޮށްފިއެވެ.

ކުރިއަށް އޮތް ފަސް އަހަރަށް އާރުޑީސީން އެކުލަވާލާ ދިގުރާސްތާގެ އިސްތިރާޖީ އެކްޝަން ޕްލޭން އިފްތިތާހު ކޮށްފިއެވެ.

މި އެކްޝަންޕްލޭން އިފްތިތާހުކޮށްފައުވަނީ ކޯޕަރޭޝަން އަހަރީ ދުވަސް ފާހަގަ ކުރުމަށް ބޭއްވި ސްޓާފް ނައިޓުގައި ކޮންސްޓްރަކްޝަން މިނިސްޓްރީގެ ސްޓޭޓް މިނިސްޓަރ ހަސަން ރަޝީދުއެވެ.

އިސްތިރާޖީ އެކްޝަން ޕްލޭނާއި ގުޅޭ އަތްމަތީ ފޮތެއްވެސް ވަނީ ނެރެފައެވެ. މި ހިނގާ އަހަރާއެކު ފަސްއަހަރަށް އަމާޒުކޮށް ތައްޔާރުކުރެވިފައިވާ އެކްޝަން ޕްލޭނުގެ މައިގަނޑު މަގްސަދަކީ އެ ކޯޕަރޭޝަންގެ ތަސައްވުރަށް ވާސިލުވުމަށްޓަކައި، އެކަށައެޅިފައިވާ އަމާޒުތަކަށް މަސައްކަތްކުރުމުގެ ސާފު މަގުޗާޓެއް އެކުލަވާލުމެވެ.

މި ޕްލޭނުގައި އިސްކަންދޭ މައިގަނޑު 5 ދާއިރާ އެއް ހިމެނޭއިރު، އެގޮތުން ކޯޕަރޭޝަނުގެ އިދާރީ އޮނިގަނޑު އިސްލާހު ކުރުމާއި، ސްޓޭކްހޯލްޑަރ އިތުބާރު ދެމެހެއްޓުން ހިމެނެއެވެ. އަދި ކުންފުނީގެ ގާބިލުކަން އިތުރުކުރުމާއި، ކޯޕަރޭޝަނުން ކުރަމުން ގެންދާ ވިޔަފާރި ފުޅާކޮށް ސިންދަފާތު ކުރުމުގެ އިތުރުން މާލީ ތަނަވަސްކަން އެންމެ ފުރިހަމައަށް ހޯދުމަށް ކުރަންޖެހޭ ކަންކަން ތަރުތީބުކޮށް ތަންފީޒް ކުރުން ވެސް ހިމެނެއެވެ.

މީގެއިތުރުން ސްޓާފް ނައިޓުގައި ބައިނަލްއަގްވާމީ އަދި ގައުމީ ފެންވަރުގެ މަތީ ވަނަތައް ހާސިލު ކުރި މުވައްޒަފުންނާއި، ވޭތުވެދިޔަ އަހަރު އެކި ގޮތް ގޮތުން ފާހަގަކުރެވުނު މުވައްޒަފުންގެ އަގުވަޒަންކޮށް ހަނދާނީ ފިލާ ވެސް ވަނީ ދީފައެވެ.