އިންސާނުން ޓްރެފިކް ކުރުމާއި ވިޔަފާރިކުރުމުގެ މައްސަލައަށް އަލިއަޅުވާލާ ފުރަތަމަ ދިވެހި ފިލްމް ދޭދަރު ރުއިން ގެ ފުރަތަަމަ ޓްރެއިލަރ ނެރެފިއެވެ.

އައިފިލްމްސް އާއި ކަޒްމިކް އިންޓަރނޭޝަނަލް އިން ނޮވެމްބަރ 6 ވަނަ ދުވަހު އާންމުކޮށްފައިވާ ޓްރެއިލަރ އިން މި ފިލްމުގެ ލީޑު އެކްޓަރ ޝަރަފުއްދީން ޢަބްދުﷲ (ޝަރަފް) ފެނިގެންދަނީ ވަރުގަދަ އެކްޝަން ކެރެކްޓަރ ރޯލަކުންނެވެ.

މި ފިލްމުގައި އެކްޝަން، ކްރައިމް، ޑްރާމާ ހިމަނާފައިވާއިރު، ރޭވިގެން ކުރެވޭ ކުށްތަކާއި، ގެވެށި އަނިޔާއާއި، ކުޑަކުދިންނަށް ނުރައްކާވުމާއި، ކުޑައިރު ލިބޭ ނަފްސާނީ ޓްރޯމާ އަށް ވެސް މި ފިލްމުގައި އަލިއަޅުވާލައެވެ. އަދި މި ފިލްމުގައި ދައްކުވައިދޭ އެއް ދުވަސް ތެރޭގައި މި ހުރިހައި މައްސަލަތައް އެއްވެ، ގުޅި ލާމެހިގެންދެއެވެ.

މި ޓްރެއިލަރ އިން ފެނިގެންދާ މަންޒަރުތަކުން އިންތިޒާރުގެ ނިމުމަށް ވަނީ ކެތްމަދުވެފައެވެ.

މިއަހަރުގެ ނޮވެމްބަރ މަހު ސިނަމާކުރުމަށް ތާވަލުކޮށްފައިވާއިރު، އެންމެގިނަ ބަޔަކު އިންތިޒާރުކުރާ އެއް ކަމަކީ މި ފިލްމުގައި ހިމެނޭ ނޭޕާލުގެ އެކްޓްރެސް ސުޝްމާގެ ކުޅަދާނަކަން ދެކިލުމަށެވެ.

ޑައިރެކްޝަންގެ ދާއިރާ އަށް އަލަށް ތައާރަފްވާ އައްޒާމު ޑައިރެކްޓް ކުރާ މި ފިލްމުގައި ޝަރަފްގެ އިތުރުން ‏މައިހާ އާދަމް ޒާހިރު އާއި ނޭޕާލު ޝުޝްމާ ވެސް ހިމެނެއެވެ. ސިނަމަޓޮގްރަފީ އިސްމާޢީލް ޔާނިމް (އޮކްނޯ) ހަދާދީފައިވާއިރު، އެޑިޓަރަކީ އާދަމް ޝިނާދު (އޮކްނޯ) އެވެ. ސައުންޑް އަދި ކްރޫ އޮކްނޯ ހަދާފައިވާއިރު، މިއުޒިކް/ބެކްގްރައުންޑް ހަދާފައިވަނީ ފައްޗުއެވެ.

މީގެއިތުރުން މޭކަޕް ކޮށްދީފައިވަނީ ސޭންޑީ އާއި ރުތުބާ އަޙްމަދުއެވެ.

އައިފިލްމްސް އިން މިހައިތަނަށް ވަނީ މަގްބޫލު ފީޗަރ ފިލްމުތަކެއް ގެނެސްދީފައެވެ. އޭގެތެރޭގައި ބަވަތި، ނީނާ ހިމެނެއެވެ.

އައިފިލްމްސް އާއި ކަޒްމިކް އިންޓަރނޭޝަނަލް އަކީ ދިވެހީންނަށް މަގްބޫލު އުފެއްދުންތަކެއް ގެނެސްދީފައިވާ ދެފަރާތެވެ.