ރާއްޖޭގެ ޒުވާން ފެތުންތެރިޔާ ޙަމްނާ އަޙްމަދު އިތުރު ދެ ކެޓަގަރީގެ ގައުމީ ރެކޯޑު އައުކޮށްފިއެވެ.

އޭނާ އައުކޮށްފައިވަނީ އަންހެނުންގެ ޝޯޓްކޯސް 50 މީޓަރ އަދި 100 މީޓަރ ބްރެސްޓްސްޓްރޯކް އިވެންޓުގެ ގައުމީ ރެކޯޑެވެ. މި ދެ ރެކޯޑު ވެސް އައުކޮށްފައިވަނީ ހަންގޭރީގައި ކުރިއަށްދިޔަ ހާޖޮސް އަލްފްރެޑް ކުޕާ 3 ގައެވެ.

އެގޮތުން އަންހެނުންގެ ޝޯޓްކޯސް 50 މީޓަރ ބްރެސްޓްސްޓްރޯކް އިވެންޓުގެ ގައުމީ އައުކުރީ 00.37.13 އިން ރޭސް ނިންމައިގެންނެވެ.

މި އިވެންޓުގެ ގައުމީ ރެކޯޑް އެންމެ ފަހުން އައު ކޮށްފައިވަނީވެސް އޭނާއެވެ. އެއީ ފައިބެއަހަރު ހަންގޭރީގައި ބޭއްވި އެގައުމުގެ ޝޯޓްކޯސް ގައުމީ މުބާރާތުގައި 00.37.88 އިން ރޭސް ފުރިހަމަކޮށްގެންނެވެ.

އަންހެނުންގެ ޝޯޓްކޯސް 100 މީޓަރ ބްރެސްޓްސްޓްރޯކް އިވެންޓުގެ ގައުމީ ރެކޯޑް ޙަމްނާ އައުކޮށްފައިވަނީ 01.23.76 އިން ރޭސް ނިންމައިގެންނެވެ.

މި އިވެންޓުގެ ގައުމީ ރެކޯރޑް އެންމެ ފަހުން އާކޮށްފައިވަނީ އައިޝަތު ސާޖިނާއެވެ. އެއީ 2019 ވަނަ އަހަރު ބޭއްވި 13 ވަނަ ސައުތު އޭޝިއަން ގޭމްސްގައި 01.23.81 އިން ރޭސް ފުރިހަމަކޮށްގެންނެވެ.