މޯލްޑިވިއަންގެ ޗާޓަރ ފްލައިޓުތައް ދެކުނު އެފްރިކާ އަށް ފެށުމަށް ނިންމައިފިއެވެ.

މައުލޫމާތު ލިބިފައިވާގޮތުގައި މި ދަތުރުތައް ފެށުމަށް މިހާރު ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުއެވެ. އަދިމި ދަތުރުތަކުގައި ބޭނުންކުރާނީ 264 ސީޓުގެ އޭ330-200 މަރުކާގެ މަތިންދާބޯޓު ކަަމަށް ވެސް މައުލޫމާތު ލިބެއެވެ.

މި މަތިންދާބޯޓުގައި ބިޒްނަސް ކްލާހުގައި 18 ސީޓާއި، ޕްރިމިއަމް އިކޮނޮމީގައި 36 ސީޓު، އަދި އިކޮނޮމީ ކްލާހުގައި 210 ސީޓު ހިމެނެއެވެ.

އައިލެންޑް އޭވިއޭޝަން ސާވިސް ލިމިޓެޑް (އައިއޭއެސްއެލް) އިން ވަނީ ދެކުނު އެފްރިކާގައި ޗާޓަރ ހިދުމަތްތަކާއި ޖެނެރަލް ޕެސެންޖަރ ސޭލްސް އެޖެންޓް (ޖީއެސްއޭ) ގެ ހިދުމަތް ފޯރުކޮށްދޭނެ ފަރާތެއް ހޯދުމަށް ކުރި އިއުލާނުގެ މުއްދަތު އިތުރުކޮށްފައެވެ.

އެ ހިދުމަތް ދިނުމަށް ޝައުގުވެރިވާ ފަރާތްތަކުން މި މަހުގެ 12 ވަނަ ދުވަހުގެ މެންދުރުފަހު 2 ޖެހުމުގެކުރިން އެންގުމަށް ވަނީ އެދިފައެވެ. ޖީއެސްއޭގެ މަސްއޫލިއްޔަތުތަކުގެ ތެރޭގައި ޗާޓަރ ދަތުރުތަކުގެ ބުކިންގ ހެދުމާއި މާކެޓްކުރުން ހިމެނެއެވެ.

ގައުމީ އެއަރލައިން، މޯލްޑިވިއަންގައި އޭ320 މަރުކާގެ މަތިންދާބޯޓެއް އޮތްނަމަވެސް، އައިލެންޑް އޭވިއޭޝަނުން ބުނާގޮތުގައި އޭ320 މަރުކާގެ މަތިންދާބޯޓު ދަތުރުކުރާ މަންޒިލްތަކަށް އޭ330-200 މަރުކާގެ މަތިންދާބޯޓު ދަތުރެއް ނުކުރާނެއެވެ.