މޯލްޑިވްސް ސޮސައިޓީ ފޯރ ޕާރފޯމިން އާޓްސް (އެމްއެސްޕީއޭ) އިން އަންނަ ޑިސެމްބަރު މަހު ބާއްވަން ތާވަލުކުރި އެކްޓިންގ ވޯކްޝޮޕް ޖަނަވަރީ މަހަށް ބަދަލުކޮށްފިއެވެ.

އެމްއެސްޕީއޭ އިން 'އޮއިވަރު' އަށް މައުލޫމާތުދިން ގޮތުގައި މި ވޯކްޝޮޕް ފަހުގެ ތާރީހަކަށް ބަދަލުކުރީ ފިލްމީ ދާއިރާއި ގުޅުންހުރި އަދި މި ވޯކްޝޮޕަށް ޝައުގުވެރިވާ ވަރަށް ގިނަ ކުދިން މިވަގުތު ތިބީ މާލެއިން ބޭރުގައި ކަމަށްވާތީއާއި އެފަރާތްތަކުގެ ބައިވެރިންގެ އެދުމުގެ މަތިން ކަމަށެވެ.

އެހެންކަމުން ވީހާވެސް ގިނަ ބައިވެރިންނަށް ފުރުސަތު ދިނުމުގެ ގޮތުން މި ވޯކްޝޮޕް މިހާރު ބޭއްވުމަށް ހަމަޖެހިފައިވަނީ އަންނަ 2025 ވަނަ އަހަރުގެ ޖަނަވަރީ 10 ގައި ކަމަށް ވެސް އެފަރާތުން މައުލޫމާތު ދިނެވެ.

މި ވޯކްޝޮޕް ބޭއްވުމަށް ކުރިން ނިންމާފައި އޮތީ މި ނޮވެމްބަރ 15 އިން ފެށިގެން ޑިސެމްބަރ 10 ވަނަ ދުވަހުގެ ނިޔަލަށެވެ. އަދި ބައިވެރިވުމުގެ ސުންގަޑިއަކަށް ހަމަޖައްސާފައިވަނީ ނޮވެމްބަރ 5 ވަނަ ދުވަހުގެ މެންދުރުފަހު 2 ޖެހުމާއި ހަމައަށެވެ.

ސްޓޭޖާއި ފިލްމުތަކުގައި އެކްޓު ކުރުމާއި ގުޅޭ ހުނަރު ދަސްކޮށްދިނުމަށް ބާއްވާ މި ވޯކްޝޮޕްގައި ބައިވެރިވާން ބޭނުން ފަރާތްތަކުން 9986585 ނުވަތަ 7727264 އަށް އައިޑީ ކާޑު ވައިބަރ ނުވަތަ ވަޓްސްއެޕް ކުރުމަށް އެމްއެސްޕީއޭ އިން އެދިފައި ވެއެވެ.

އެމްއެސްޕީއޭ އިން ވިދާޅުވީ މި ވޯކްޝޮޕުގައި ފީއެއްގެ ގޮތުގައި 500 ރުފިޔާ ދައްކަންޖެހޭނެ ކަމަށެވެ. އަދި މުދައްރިބުންނަކީ އެކްޓިންގ ދާއިރާރާއްޖޭއިން ތަމްރީނު ހޯދައި، އެކަމުގެ ތަޖުރިބާކާރު ރާއްޖެއިން ބޭރުގެ ފަރާތްތައް ކަމަށް ވެސް ވިދާޅުވިއެވެ.

މި ވޯކްޝޮޕް ހުކުރު ދުވަސް ފިޔަވައި ކޮންމެ ދުވަހެއްގެ ރޭ 8 ން 11 އަށް ކުރިއަށްގެންދާނީ އެންސީއޭ ގައި ކަމަށް ވެސް އެމްއެސްޕީއޭ އިން ވިދާޅުވިއެވެ.