ސްޓެލްކޯ އިން ރާޅުތައް މޮނިޓަރކުރުމުގެ މަޝްރޫއެއް ފަށައިފިއެވެ.

މިއީ ރާއްޖޭގެ އިއާދަކުރަނިވި ހަކަތައިގެ އިންސައްތަ 33 އިންސައްތަ އަށް އުފުލުމަށް ރައީސް ޑރ. މުޢިއްޒު ކުރައްވާފައިވާ ވައުދު ފުއްދުމަށް އެ ކުންފުނިން ފަށާފައިވާ މަޝްރޫއެކެވެ.

ރާއްޖޭގައި ދެމެހެއްޓެނިވި ހަކަތައިގެ ހައްލުތައް ހޯދުމަށާއި ރައީސް ޑރ. މުޙައްމަދު މުޢިއްޒުގެ އިއާދަކުރަނިވި ހަކަތައިގެ އިންސައްތަ 33 އިންސައްތަ އަށް އުފުލުމުގެ ވައުދު ފުއްދުމަށް، ސްޓެލްކޯ އިން ފަށާފައިވާ ރާޅުތައް މޮނިޓަރކުރުމުގެ ޓެކްނޮލޮޖީ ބޭނުންކުރުމުގެ މަޝްރޫއަކީ ވަރަށް މުހިންމު ފިޔަވަޅެކެވެ.

ރާޅުތަކުން ހަކަތަ އުފެއްދުމުގެ ދާއިރާ ތަރައްގީކުރުމަށް މަސައްކަތްކުރުމުން، ސްޓެލްކޯ އިން އާންމުކޮށް ބޭނުންކުރާ އިރުގެ އަލީގެ އިތުރުން އިއާދަކުރަނިވި ހަކަތައިގެ އައު ދާއިރާއެއް ހުޅުވައިދެއެވެ. މި މަޝްރޫއުގައި ހިމެނެނީ ރާއްޖެއަށް ކަނޑުގެ ރާޅުތަކުން ހަކަތަ އުފެއްދުމުގެ ފުރުސަތު އޮތްތޯ ބެލުމަށް ގިނަ މައުލޫމާތު އެއްކޮށް، ދިރާސާކުރުމެވެ.

ރާޅުތަކުން ހަކަތަ އުފެއްދުމުގައި ގިނަ ފައިދާތަކެއްވާއިރު، އޭގެ ތެރޭގައި އިރުގެ އައްޔާއި އަޅާބަލާއިރު، މޫސުމުގެ ބަދަލުތަކުން ރާޅުތަކަށް ކުރާ އަސަރު ކުޑަވުމުގެ ސަބަބުން ހަކަތަ އުފެއްދުން އެއްވަރެއްގައި ދެމެހެއްޓުމުގެ ފުރުސަތު ބޮޑުވުން ހިމެނެއެވެ.

މި ދިރާސާއިން ސްޓެލްކޯ އިން ބަލަނީ މިހާރު ބޭނުންކުރާ އިއާދަކުރަނިވި ހަކަތައިގެ ވަސީލަތްތަކާއެކު ރާޅުތަކުން ހަކަތަ އުފެއްދުމުގެ ފުރުސަތު އޮތްތޯއެވެ. މިކަމުގެ ސަބަބުން ހަކަތައިގެ ވިއުގަ އިތުރަށް ހަރުދަނާވެ، އިތުބާރު ބޮޑުވާނެއެވެ.

މި މަސައްކަތުން ސްޓެލްކޯއިން އައު ކަންތައްތައް ތައާރަފުކުރުމަށް ކުރާ މަސައްކަތް ހާމަވެ، ރާއްޖޭގެ ސާފު އަދި ދެމެހެއްޓެނިވި މުސްތަގްބަލަކަށް ކުރާ މަސައްކަތަށް އެހީތެރިވެދެއެވެ. އަދި ރާއްޖޭގެ އިއާދަކުރަނިވި ހަކަތައިގެ ލަނޑުދަނޑިތައް ހާސިލުކުރުމަށް މަގުފަހިވެގެންދާނެއެވެ.