އަޒަރުބައިޖާންގެ ދަތުރުތައް ރާއްޖެއަށް ފަށައިފިއެވެ.

މި ދަތުރުތައް ފަށާފައިވަނީ ނޮވެމްބަރ 9 ވަނަ ދުވަހުއެވެ. އަޒަރުބައިޖާންގެ ވެރިރަށް ބަކޫ އިން ވެލާނާ އިންޓަރނޭޝަނަލް އެއަރޕޯޓު (ވީއައިއޭ) އަށް ކުރި ފުރަތަމަ ފްލައިޓުން ރާއްޖެ އައި ފަތުރުވެރިންނަށް ވީއައިއޭ އިން ވަނީ ހޫނު މަރުހަބާއެއް ކިޔާފައެވެ.

އަޒަރުބައިޖާން އެއަރލައިންގެ ސީދާ ދަތުރުތައް ރާއްޖެއަށް ފެށުމުން ދެ ގައުމުގެ މެދުގައި ދަތުރުފަތުރުގެ ގުޅުން ވަރުގަދަވެ، އެ ގައުމުން ރާއްޖެއަށް ޒިޔާރަތްކުރާ ފަތުރުވެރިންނަށް ފަސޭހައިން ދަތުރު ކުރެވޭނެ މަގު ފަހިވެގެންދާނެ ކަމަށް އެމްއޭސީއެލް އިން ވަނީ ހާމަކުރައްވާފައެވެ.

ހަފުތާއަކު ދެ ދަތުރު މި އެއަރަލައިނުން ކުރުމަށް ތާވަލުކޮށްފައި ވެއެވެ. އަދި މި ދަތުރުތަކުގައި ބޭނުންކުރާނީ ބޮއިންގ 787 ޑްރީމްލައިނަރ އެއަރކްރާފްޓް ކަމަށް ވެސް ވަނީ ހާމަކޮށްފައެވެ.

މިއީ ގާތްގަނޑަކަށް 6 ގަޑިއިރުގެ ދަތުރެކެވެ. އަދި މިއީ އަޒަރުބައިޖާން އެއަރލައިނުން ރާއްޖެއަށް ދަތުރުތައް ފެށި ފުރަތަމަ ފަހަރު ވެސް މެއެވެ.

ރާއްޖެއަށް މިހާރު ވެސް ބައިނަލްއަގްވާމީ ގިނަ އެއަރލައިންތަކަކުން އަންނަނީ ދަތުރުކުރަމުންނެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން ރާއްޖެއަށް މިވަގުތު ބައިނަލްއަގްވާމީ 42 އެއަރލައިނަކުން އަންނަނީ ދަތުރުކުރަމުންނެވެ.