ދިވެހި ފިލްމު "ދޭދަރު ރުއިން" ގެ ޓިކެޓު ވިއްކަން ފަށައިފިއެވެ.

އައިފިލްމްސް އާއި ކަޒްމިކް އިންޓަރނޭޝަނަލް އިން ގެނެސްދޭ މި ފިލްމުގެ ޓިކެޓު ވިއްކަން ފަށާފައިވަނީ ނޮވެމްބަރު 9 ވަނަ ދުވަހުގެ މެންދުރުން ފެށިގެންނެވެ.

އެ ޕްރޮޑަކްޝަނުން ބުނީ އޮލިމްޕަހުގެ ކައުންޓަރުންނާއި 7242555 އަށް ގުޅައިގެން ވެސް ޓިކެޓުގެ ކަންކަން ކުރިއަށް ގެންދެވޭނެ ކަމަށެވެ.

ދޭދަރު ރުއިން މި ފިލްމަކީ އިންސާނުން ޓްރެފިކް ކުރުމާއި ވިޔަފާރިކުރުމުގެ މައްސަލައަށް އަލިއަޅުވާލާ އުފައްެދާފައިވާ ފުރަތަމަ ދިވެހި ފިލްމެވެ.

މި ފިލްމުގައި އެކްޝަން، ކްރައިމް، ޑްރާމާ ހިމަނާފައިވާއިރު، ރޭވިގެން ކުރެވޭ ކުށްތަކާއި، ގެވެށި އަނިޔާ ވަނީ ހިމަނާފައެވެ. އަދި ކުޑަކުދިންނަށް ނުރައްކާވުމާއި ކުޑައިރު ލިބޭ ނަފްސާނީ ޓްރޯމާ އަށް ވެސް މި ފިލްމުގައި އަލިއަޅުވާލާފައިވާ ކަމަށް އެ ޕްރޮޑަކްޝަނުން މައުލޫމާތު ދެއެވެ.

މީގެއިތުރުން މި ފިލްމުގައި ދައްކުވައިދޭ އެއް ދުވަސް ތެރޭގައި މި ހުރިހައި މައްސަލަތައް އެއްވެ، ގުޅި ލާމެހިގެންދާ ކަމަށް ވަނީ ބުނެފައެވެ.

މި ނޮވެމްބަރ މަހު، ސިނަމާ ކުރުމަށް ނިންމާފައިވާ މި ފިލްމުގެ ލީޑު އެކްޓަރެއްގެ ގޮތުގައި ޝަރަފުއްދީން ޢަބްދުﷲ (ޝަރަފް) އާއި ‏މައިހާ އާދަމް ޒާހިރު ހަރަކާތްތެރިވާއިރު، ނޭޕާލުގެ އެކްޓްރެސް ސުޝްމާގެ ކުޅަދާނަކަން ވެސް ފެންނާނެއެވެ.

ޑައިރެކްޝަންގެ ދާއިރާ އަށް އަލަށް ތައާރަފްވާ އައްޒާމު ޑައިރެކްޓް ކުރާ މި ފިލްމުގެ ސިނަމަޓޮގްރަފީ އިސްމާޢީލް ޔާނިމް (އޮކްނޯ) ހަދާދީފައިވާއިރު، އެޑިޓަރަކީ އާދަމް ޝިނާދު (އޮކްނޯ) އެވެ. ސައުންޑް އަދި ކްރޫ އޮކްނޯ ހަދާފައިވާއިރު، މިއުޒިކް/ބެކްގްރައުންޑް ހަދާފައިވަނީ ފައްޗުއެވެ.

މީގެއިތުރުން މޭކަޕް ކޮށްދީފައިވަނީ ސޭންޑީ އާއި ރުތުބާ އަޙްމަދުއެވެ.

އައިފިލްމްސް އިން މިހައިތަނަށް ވަނީ މަގްބޫލު ފީޗަރ ފިލްމުތަކެއް ގެނެސްދީފައެވެ. އޭގެތެރޭގައި ބަވަތި، ނީނާ ހިމެނެއެވެ.

އައިފިލްމްސް އާއި ކަޒްމިކް އިންޓަރނޭޝަނަލް އަކީ ދިވެހީންނަށް މަގްބޫލު އުފެއްދުންތަކެއް ގެނެސްދީފައިވާ ދެފަރާތެވެ.