ޝޭޑްސް އޮފް މައިންޑް ކުރެހުމުގެ މައުރަޒު އިފްތިތާހުކޮށްފިއެވެ.

މި މައުރަޒު އިފްތިތާހުކޮށްދެއްވީ ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް އެވެ.

މައުރަޒު ހުޅުއްވައިދެއްވުމުގެ ގޮތުން، މައުރަޒުގައި ބަހައްޓާފައިވާ ފޮޓޯތައް ހިމެނޭ ކެޓަލޮގެއް ނައިބުގެ އަތްޕުޅަށް އަރުވާފައިވެއެވެ. އަދި އެއަށްފަހު ހާއްސަ ފޮޓޯއެއް ވަނީ ނަންގަވާފައެވެ.

މީގެއިތުރުން މައުރަޒު އިފްތިތާހުކޮށްދެއްވުމަށްފަހު ނައިބު ވަނީ މައުރަޒުގެ ކުރެހުންތައް ބައްލަވާލައްވާފައެވެ.

މިނިސްޓްރީ އޮފް ޔޫތު އެމްޕަވަމަންޓް، އިންފޮމޭޝަން އެންޑް އާޓްސް އިން އިންތިޒާމުކުރާ މި މައުރަޒަކީ، ފަންނުވެރިކަމުގެ ތެރެއިން ނަފްސާނީ ހޭލުންތެރިކަން އިތުރުކޮށް، ނަފްސާނީ ދުޅަހެޔޮކަމުގެ މުހިންމުކަމާމެދު ހޭލުންތެރިކަން އިތުރުކުރުމުގެ މަގްސަދުގައި ބާއްވާ މައުރަޒެކެވެ.

މި މަހުގެ 12 އިން 17 އަށް ނޭޝަނަލް އާޓް ގެލެރީގައި ކުރިއަށްގެންދާ މި މައުރަޒުގައި ދައްކާލާ ކުރެހުންތަކަކީ، އާންމުކޮށް ހުޅުވާލައިގެން ރާއްޖޭގެ އެކި ކަންކޮޅުތަކުގެ ޒުވާނުން ހުށަހެޅި ކުރެހުންތަކެވެ.