މޫސުމަށް އަންނަ ނޭދެވޭ ބަދަލުތަކުން އަރައިގަތުމަށް ދޭ ބައިނަލްއަގްވާމީ މާލީ އެހީގެ ވައުދުތައް އިތުރުކުރެއްވުމަށް ރައީސް ޑރ. މުޙައްމަދު މުޢިއްޒު ގޮވާލައްވައިފިއެވެ.

އެމަނިކުފާނު މިފަދައިން ގޮވާލެއްވީ އެކުވެރި ދައުލަތްތަކުގެ ފްރޭމްވަރކް ކޮންވެންޝަން އޮން ކްލައިމެޓް ޗޭންޖު (ޔޫ.އެން.އެފް.ސީ.ސީ.ސީ) ގެ ކޮންފަރެންސް އޮފް ޕާޓީސްގެ 29 ވަނަ ސެޝަން (ކޮޕް29) ގެ ޕްލެނަރީގައި ރާއްޖޭގެ ގައުމީ ބަޔާން އިއްވަވަމުންނެވެ.

ރައީސް ވަނީ މޫސުމަށް އަންނަ ނޭދެވޭ ބަދަލުތަކުން އަރައިގަތުމަށާއި މޫސުމަށް އަންނަ ބަދަލުތައް ކުޑަކުރުމަށާއި ގެއްލުންތަކާއި ހިރާސްތަކަށް ހައްލު ހޯދައިދިނުމަށް ވެސް ގޮވާލައްވާފައެވެ. އަދި މޫސުމަށް އަންނަ ބަދަލުތަކުގެ ހަގީގީ މިންގަނޑާ އެއްގޮތްވާ ގޮތުގެ މަތިން، ކްލައިމެޓް ފައިނޭންސިންގ ގެ އައު ލަނޑުދަނޑިއެއް ކަނޑައެޅުން މުހިންމުކަން ފާހަގަކުރެއްވިއެވެ.

މީގެއިތުރުން މި އެހީ ބޭނުން ވަނީ ބިލިއަނުން ނޫން ކަމަށާއި އެހީބޭނުންވަނީ ޓްރިލިއަނުން ކަމަށް ވެސް ވިދާޅުވިއެވެ.

ތަރައްގީވަމުން އަންނަ ކުދި ޖަޒީރާ ގައުމުތައް، ނުވަތަ ސްމޯލް އައިލެންޑް ޑިވެލޮޕިންގ ސްޓޭޓްސް (ސިޑްސް) އަށް ކުރިމަތިވެފައިވާ ތަފާތު ގޮންޖެހުންތަކުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ ރާއްޖެއަކީ އާދަޔާ ޚިލާފު ހިތްވަރެއް ލިބިފައިވާ ގައުމެއްކަމުގައެވެ.

މީގެއިތުރުން އެކަށީގެންވާ މާލީ އެހީ ނުލިބުމުގެ ސަބަބުން ރާއްޖެފަދަ ކުދި ޖަޒީރާ ގައުމުތަކުގެ އުންމީދުތަކަށް ހުރަސްއެޅޭކަން ފާހަގަކުރައްވައި، ކްލައިމެޓް ފައިނޭންސްގެ އެންމެ ފަހުގެ އޮނިގަނޑުގައި، މިހާރު ބޭނުންވެފައިވާކަން ވަނީ ފާހަގަކުރައްވާފައެވެ. އަދި މުސްތަގްބަލުގެ ވިލުންވެރިކަމަށް އިސްކަން ދިނުމަށް ވެސް ގޮވާލެއްވިއެވެ.

ހަމަމިއާއެކު ރާއްޖޭގެ ތިމާވެއްޓާއި ކަނޑުތަކަކީ، ރާއްޖޭގެ ޘަޤާފީވަންތަކަމުގެ ތެރޭގައި ހިމެނޭ ބައެއްގެ ގޮތުގައި ސިފަކުރައްވަމުން އެމަނިކުފާނު ވަނީ، އެއީ އެގޮތަށް ގަބޫލުކުރަން ލާޒިމު އަދި އެގޮތުގައި ހިފަހައްޓަންޖެހޭ ކަމެއް ކަމަށް ވެސް ވިދާޅުވެފައެވެ.