ރާއްޖޭގައި ވޭޕް މަނާކުރާ ބިލު ރައްޔިތުންގެ މަޖިލީހުން ފާސްކޮށްފިއެވެ.

ސަރުކާރުގެ ފަރާތުން ހެންވޭރު އުތުރު ދާއިރާގެ މެންބަރު އަހުމަދު އައިފާން ހުށަހެޅުއްވި މި ބިލު މަޖިލީހުން ފާސްކުރީ 54 މެންބަރުންގެ ވޯޓާއެކުގައެވެ. މި ބިލު ފާސްކުރުމާ ގުޅޭގޮތުން 8 މެންބަރަކު އެއްވެސް ކޮޅަކަށް ވޯޓު ދީފައެއް ނުވެއެވެ.

މި ބިލު ހުށަހެޅުމުގެ ބޭނުމަކީ އީ-ސިނގިރޭޓާއި، ވޭޕްކުރުމަށް ބޭނުންކުރާ އާލާތްތަކާއި، އެ އެއްޗިއްސާއެކު ބޭނުންކުރުމަށް ތައްޔާރުކޮށްފައިވާ އުފެއްދުންތައް ރާއްޖެއަށް އެތެރެކުރުމާއި، ވިއްކުމާއި، ހިލޭ ބެހުމާއި، ބޭނުންކުރުން މަނާކުރުމެވެ.

މީގެއިތުރުން ގާނޫނާ ހިލާދަށް ޢަމަލުކުރާ ފަރާތްތަކާމެދު ގާނޫނުގެ ދަށުން އެޅޭނެ ފިޔަވަޅުތައް އިތުރުކުރުމަށާއި އެ ނޫންވެސް ގާނޫނު ތަންފީޒުކުރުމުގައި ދިމާވާ ދަތިތައް ހައްލުކުރުމެވެ.

ސަރުކާރުން ނިންމައިފައިވަނީ، ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން މި ހިނގާ ނޮވެމްބަރ މަހުގެ 15 ވަނަ ދުވަހުން ފެށިގެން މަނާކުރުމަށެވެ. އަދި ވޭޕްކުރުމަށް ބޭނުންކުރާ ތަކެތި ރާއްޖޭގައި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރު ކުރުމާއި ހިލޭބެހުން އަންނަ ޑިސެމްބަރ މަހުގެ 15 ވަނަ ދުވަހުން ފެށިގެން މަނާވާނެއެވެ.

އޭގެ ފަހުން ރާއްޖޭގައި ވޭޕު ވިއްކާ ކޮންމެ މީހެއް 20،000 ރުފިޔާ އިން ޖޫރިމަނާ ކުރާއިރު، ވިއްކި ކޮންމެ ވޭޕަކަށް 10،000 ރުފިޔާގެ ޖޫރިމަނާއެއް ކުރާނެއެވެ. އަދި ހިލޭ މީހަކަށް ވޭޕެއް ދިނަސް 10،000 ރުފިޔާއިން ޖޫރިމަނާ ކުރާނެއެވެ.

ހަމަމިއާއެކު ވޭޕް ކުރަން ބޭނުން ކުރާ އާލާތްތަކާއި އެކަމަށް ތައްޔާރު ކޮށްފައިވާ އުފެއްދުންތައް ރާއްޖެ އެތެރެކޮށްފި ނަމަ، 50،000 ރުފިޔާއިން ޖޫރިމަނާ ކުރުމަށް ވަނީ ނިންމާފައެވެ. އަދި އަންނަ ބުރާސްފަތި ދުވަހުން ފެށިގެން ދުންފަތް ގަނެ ވިއްކޭނެ އެންމެ މަތީ އުމުރަކީ 21 އަހަރު ކަމަށް ވެސް ބިލުގައި ވަނީ ހިމަނާފައެވެ.