ނުދެއްކޭވަރުގެ ބޮޑު ލޯނެއް އެމްޑީޕީ ސަރުކާރުން ނަގާފައި ނޯންނާނެ ކަމުގައި މާލޭސިޓީގެ މިހާރުގެ މޭޔަރު އާދަމް އާޒިމް ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ އެމްޑީޕީން އާޓިފިޝަލް ބީޗުގައި ކުރިއަށްގެންދާ 'ފުދިއްޖެ-ފުޑިއްޖެ' ޖަލްސާގައި ވާހަކަ ދައްކަވަމުންނެވެ.

އެސްޓީއޯ، އެމްޑަބްލިއުއެސްސީ އަދި އެމްޓީސީސީ ގެ ސީއީއޯ ގެ މަގާމު އަދާކުރައްވާފައިވާ އާޒިމް ވިދާޅުވީ އެކަން މިސަރުކާރަށް ވެސް އެނގޭނޭ ކަމަށެވެ. އަދިއެެމްޑީޕީ ސަރުކާރުން ނަގާފައިވާ ލޯނާއި ކޮށްފައިވާ ޚަރަދު ޓްރާންސިޝަން މުއްދަތުގައި މިސަރުކާރަށް ވަރަށް ރަނގަޅަށް އެނގޭނޭ ކަމަށެވެ.

މީގެއިތުރުން ގައުމުދަރުވާލިކަމުގެ ތުހުމަތު އެމްޑީޕީ ސަރުކާރުގެ ބޮލުގައި މި ސަރުކާރުން އަޅުވަމުންދާއިރު، އެއީ އެއްވެސް ހަގީގަތެއް އޮތްކަމެއްނޫންކަމަށް ވެސް ވިދާޅުވިއެވެ. އަދި މިގައުމު ދަރުވާލީ މިހާރުގެ ސަރުކާރުން ކަމަށް އޭނާ ވަނީ ތުހުމަތު ކުރައްވާފައެވެ.

އާޒިމް ވަނީ ވެރިކަމަށް އައި ގޮތަށް ފަންސަތިރީސް މިލިއަން ޑޮލަރު ދީފައި ”ދޫނިތަކެއް“ ގަތީ ކޮންތާކުހުރި ފައިސާއަކުންތޯ ސުވާލުކުރައްވާފައެވެ. އަދި ވެރިކަމަށް އައިއިރު ބަޖެޓުގައި ފައިސާނެތްކަމަށްވާނަމަ، އެކަން އެގޮތަށް ނުކުރެވޭނޭ ކަމަށް ވިދާޅުވިއެވެ.

މި ޖަލްސާގައި އާޒިމް ވިދާޅުވީ މިސަރުކާރަށް އަހަރުވެގެންދާއިރު، އެންމެ ގާބުރިއެއްވެސް ބޭއްވިފައިނުވާ ކަމަށާއި ހުޅުވަމުންދަނީ ކުރީގެ ސަރުކާރުން ފަށައިފައިވާ މަޝްރޫއުތައް ކަމަށެވެ.

އެމްޑީޕީ ސަރުކާރުން، ކޮންމެ އެގާރަ ދުވަހަކުން ޕްރޮޖެކްޓެއް ނިންމާފައި ކަމަށް ވެސް އާޒިމް ވަނީ ވިދާޅުވެފައެވެ.