މިހާރުކުރިއަށްދާ 6 ވަނަ ވަރލްޑް ކަޕް ކެރަމް މުބާރާތުގެ ސެމީ ފައިނަލަށް ރާއްޖޭގެ އަންހެން ޓީމާއި ފިރިހެން ޓީމު ދަތުރުކޮށްފިއެވެ.

ކެރަމް އެސޯސިއޭޝަނުން ވިދާޅުވީ ސެމީ ފައިނަލުގައި މި ދެޓީމުވެސް ވާދަކުރަންޖެހޭނީ އަވަށްޓެރި ސްރީލަންކާ އާ ކަމަށާއި މި މެޗުތައް ކުޅޭނީ މާދަމާ ކަމަށެވެ.

މި ނޮވެމްބަރ މަހުގެ 11 އިން 17 ވަނަ ދުވަހުގެ ނިޔަލަށް މި މުބާރާތް ކުރިއަށްދަނީ އެމެރިކާގެ ކެލިފޯނިއާގައެވެ.

ރާއްޖޭގެ އަންހެން ޓީމުގައި ހިމެނެނީ އައިމިނަތު ވިދާދާ، އައިޝަތު ނަހުފާ، އައިޝަތު ފައިނާޒު އަދި ފާޠިމަތު ރަޔާނާއެވެ. ފިރިހެން ޓީމުގައި ހިމެނެނީ ހަސަން ނާޒިމް، އިބްރާހިމް ހުޖާން އަލީ، އިސްމާއިލް އަޒްމީން އަދި މުހައްމަދު މުންތަސިރުއެވެ.

ދިވެހި ގައުމީ ކެރަމް ޓީމަށް ފުރިހަމަ ކާމިޔާބ އަށް 'އޮއިވަރ' ގެ ކިޔުންތެރިންނާއި މުވައްޒަފުން އަދި މެނޭޖުމަންޓުގެ ފަރާތުން އެދެމެވެ.