އެމްޑީޕީ ސަރުކާރުން ރައީސް ޑރ. މުޙައްމަދު މުއިއްޒަށް ވެރިކަން ހަވާލުކުރިއިރު ގައުމު އޮތީ ރަނގަޅު ހާލަތެއްގައި ކަމުގައި ކުރީގެ ރައީސް އިބްރާހިމް މުޙައްމަދު ސާލިހު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ރޭ އާޓިފިޝަލް ބީޗްގައި ބޭއްވި "ފުދިއްޖެ، ފުނޑިއްޖެ" ޖަލްސާގައި ވާހަކަފުޅު ދައްކަވަމުންނެވެ.

"ނަމަވެސް، މިއަދު ވަނީ ގައުމު ފުނޑާލާފަ. މިހާރުގެ ސަރުކާރުން ޑޮލަރުގެ އަގު އިންތިހާއަށް ބޮޑުކޮށް، އަސާސީ ހައްގުތަކުން މަހުރޫމްކޮށް، މީޑިއާގެ މިނިވަންކަން ވަނީ ގެއްލުވާލާފަ." ރައީސް ސާލިހު ވިދާޅުވިއެވެ.

މީގެއިތުރުން އެމްޑީޕީ ސަރުކާރުން ރައްޔިތުންނަށް ދޫކޮށްފައިވާ ގޯތިތަކާއި ފްލެޓްތައް މި ސަރުކާރުން އަތުލަން ރާވަމުންދާތީ، މިކަމާ ދެކޮޅަށް ރައްޔިތުން ނިކުންނަން ޖެހިއްޖެ ކަމުގައި ވެސް އެމަނިކުފާނު ވިދާޅުވިއެވެ. އަދި ވަނީ ސަރުކާރާ ދެކޮޅަށް ރައްޔިތުން އިހުތިޖާޖަށް ނިކުންނަން ގޮވާލައްވާފައެވެ.