އަންނައަހަރަށް ލަފާކޮށް ސަރުކާރުން، ރައްޔިތުންގެ މަޖިލީހަށް ހުށަހަޅާފައިވާ ބަޖެޓުގެ ބަހުސް މިރޭ 11 ޖަަހަންދެން ކުރިއަށް ގެންދިއުމަށް ފާސްކޮށްފިއެވެ.

ނޮވެމްބަރ 12 ވަނަ ދުވަހު ފެށި މި ބަހުސް މިރޭ 11 ޖަހަންދެން ކުރިއަށް ގެންދިއުމަށް ނިންމާފައިވަނީ ދައުލަތުގެ ބަޖެޓުގެ ބަހުސްގައި ވާހަކަދައްކަވަން ބޭނުންވެވަޑައިގަންނަވާ މެންބަރުންނަށް ފުރުސަތު ދެއްވުމަށްޓަކައެވެ.

މިކަން ހާމަކުރައްވައި، ރައްޔިތުންގެ މަޖިލީހުގެ މިއަދުގެ ޖަލްސާ ފައްޓަވަމުން މަޖިލިސް ރައީސް އަބްދުއްރަހީމް އަބްދުﷲ ވިދާޅުވީ މިރޭ 11:00 އާ ހަމައަށް ބަޖެޓް ބަހުސް ކުރިއަށް ގެންދަން ނިންމަވާފައިވާ ކަމަށާއި މާދަމާގެ ޖަލްސާގެ ވަގުތު ވެސް އިތުރު ކުރުމަށް ނިންމަވާފައިވާ ކަމަށެވެ.

އެހެންވެ، މިއަދާއި މާދަމާގެ މަޖިލިސް ޖަލްސާގެ ވަގުތު އިތުރުކުރުމަށް މަޖިލީހަށް ހުށަހެޅުއްވުމުން އެގޮތަށް ފާސްކުރައްވާފައިވަނީ ޖަލްސާގައި ތިއްބެވި 53 މެންބަރުންގެ ތެރެއިން 52 މެންބަރުން ވޯޓުދެއްވައި، އިއްތިފާގުންނެވެ.

އަންނަ އަހަރަށް ލަފާކޮށް 56.6 ބިލިއަން ރުފިޔާގެ ބަޖެޓެއް ސަރުކާރުން ރައްޔިތުންގެ މަޖިލީހަށް ހުށަހަޅާފައި ވަނީ މިދިޔަ އޮކްޓޫބަރު މަހުގެ 31 ވަނަ ދުވަހުއެވެ. އެދުވަހުގެ ޖަލްސާގައި ފިނޭންސް މިނިސްޓަރު މޫސާ ޒަމީރު ބަޖެޓް ހުށަހެޅުއްވުމުން، ދިރާސާކުރުމަށް ކޮމިޓީއަށް ވަނީ ފޮނުއްވާފައެވެ.

ރައްޔިތުންގެ މަޖިލީހުގެ އާއްމު ކޮމެޓީން ނިންމާފައިވަނީ، ބަޖެޓް ބަހުސްގައި ވާހަކަ ދެއްކެވުމަށް މަޖިލީހުގެ ކޮންމެ މެންބަރަކަށް 15 މިނެޓުގެ ފުރުސަތެއް ދިނުމަށެވެ.

ބަޖެޓުގެ ބަހުސް ހިނގަމުންދާ ވަގުތު މެންބަރުން ފާހަގަކުރައްވާ ނުކުތާތަކަށް ޖަވާބުދެއްވުމަށް ރައްޔިތުންގެ މަޖިލީހުގެ ރައީސް ކަނޑައަޅުއްވާ ގޮތެއްގެ މަތީން ފިނޭންސް މިނިސްޓަރަށް ޖުމުލަ 45 މިނެޓުގެ ވަގުތެއް ދިނުމަށް ވެސް ކޮމިޓީން ވަނީ ނިންމާފައެވެ.