ދޭދަރު ރުއިން ފިލްމުގެ ޕްރިމިއަރ ޝޯވ އަށް ނަގާފައިވާ ދުވަސް އޮލިމްޕަސް ހޯލު އެން.ސީ.އޭ އިން އަތުލައިފިއެވެ.

މި ފިލްމު އުފައްދާ ކަޒްމިކް އިންޓަރނޭޝަނަލް އާއި އައިފިލްމްސް އިން ނެރެފައިވާ މީޑިއާ ސްޓޭޓްމެންޓެއްގައި ބުނެފައިވަނީ އެ ފިލްމުގެ ޕްރިމިއަރ ޝޯވ ބޭއްވުމަށް ހަމަޖެހަމަޖެހިފައިވާ ދުވަސްކަމުގައިވާ މި ނޮވެމްބަރ މަހުގެ 20 ވަނަ ދުވަސް އެން.ސީ.އޭ އިން ވަނީ ކުއްލިއަކަށް އަތުލާފައި ކަމަށެވެ. އަދި މިއީ ދިވެހި ފިލްމީ ސިނާއަތަށް ވެވުނު ވަރަށް ބޮޑު ބޭއިންސާފެއް ކަމަށެވެ.

އެ ޕްރޮޑަކްޝަނުން ބުނީ އެންސީއޭ އިން އެކަން އަންގާފައިވަނީ އޮލިމްޕަސް ސިނަމާގައި އެ ފިލްމު ޕްރިމިއަރ ކުރުމަށް ވާންޖެހޭ ހުރިހާ ތައްޔާރީތަކެއް ވެ، ހޯލުގެ ބޮޑު ބައި ފުރިފައިވަނިކޮށް ކަމަށެވެ.

" އަޅުގަނޑުމެން ކުއްޔަށް ހިފާފައިވާ ތާރީޚުތަކުން 20 ނޮވެމްބަރު އުނިކުރި ކަމަށް ސަރުކާރު ބަންދު ދުވަހެއް ކަމަށްވާ 10 ނޮވެމްބަރު ވީ އާދީއްތަ ދުވަހު މެންދުރު އެން.ސީ.އޭ އިން ވަނީ އީމެއިލް ކޮށްފައެވެ. ފިލްމު އެޅުވުމަށްޓަކައި ނެގުނު ތާރީޚުތަކަކީ 1 އަހަރު ކުރިން އަޅުގަނޑުމެން ބުކް ކޮށް، 4 މަސް ކުރިން ފައިސާ ދައްކާފައިވާ ތާރީޚުތަކެކެވެ. އެން.ސީ.އޭ އިން މި ބަދަލު ގެނެސްފައިވަނީ އެއްވެސް މަޝްވަރާއެއް ނުވަތަ އިޝާރާތެއް ވެސް ނުދީއެވެ." އެ ދެ ޕްރޮޑަކްޝަނުން ނެރުނު ބަޔާނުގައި ވެއެވެ.

މީގެއިތުރުން ސަރުކާރުގެ ބޭނުމަށްކަމަށް ބުނެ ދުވަސް އަތުލާފައިވަނީ ކުރިން 17، 18 އަދި 19 ގައި އޮންނަ ކަމަށް އިޢުލާންކޮށްފައިވާ އޮލިމްޕިއަންސް ޝޯ 18، 19 އަދި 20 އަށް ބަދަލުކުރުމަށް ކަމަށް ވެސް އެ ބަޔާނުގައި ވެއެވެ.

އެފަރާތުން ބުނީ ފިލްމެއް ތައްޔާރުކޮށް ޕްރިމިއަރ ތާރީޚު އިއުލާނުކޮށް، ހުރިހާ ޕޯސްޓަރު އަދި ބިލްބޯޑުތައް ޕްރިންޓްކޮށް، ޕްރިމިއަރ ޝޯވ އަށް ދަޢުވަތުތައް ފޮނުވާ، ޓިކެޓް ވިއްކަމުންދަނިކޮށް މިގޮތަށް ކުއްލިއަކަށް އެންގުމުން ފިލްމު އުފެއްދި ފަރާތަށް ލިބޭނެ ގެއްލުމުގެ އަންދާޒާ އެންމެ ރަނގަޅަށް ކުރެވޭނީ ފަންނާނުންގެ ބަލަދުވެރި އެން.ސީ.އޭ އަށް ކަމަށް އުންމީދުކުރެވުނު ނަމަވެސް، އެން.ސީ.އޭ ގެ މި ޢަމަލުން އެކަން ވަނީ ދޮގުވެފައެވެ.

މިކަން މަޝްވަރާކުރުމުގެ ބޭނުމުގައި އެން.ސީ.އޭ އަށް އެ ދުވަހު އެފަރާތުން ދިޔަ ނަމަވެސް، ބަންދު ދުވަސްތަކެއް ކަމުން އެތަނުން އެއްވެސް މުވައްޒަފަކާ ދިމާނުވިކަން ފާހަގަކޮށް އެބަޔާނުގައި ވަނީ މިނިސްޓަރު އޮފް ޔޫތު އެންޕަވަރމަންޓް، އިންފޮމޭޝަން އެންޑް އާޓްސް، އިބްރާހިމް ވަހީދު (އަސްވާޑް) އަށް ގުޅާ ނުތަނަވަސްކަން ހާމަކުރުމުން ޑެޕިއުޓީ މިނިސްޓަރަށް ގުޅުމަށް ވިދާޅުވި ކަމަށެވެ. އެކަމަކު ޑެޕިއުޓީ މިނިސްޓަރަށް ގުޅައިގެން ވެސް މިކަމުގެ ޒިންމާ އެއްވެސް ފަރާތަކުން ނަގާފައިނުވާކަމަށް އެ ބަޔާނުގައި ވެއެވެ.

އެބަޔާނުގައި އިތުރަށް ބުނީ މިއީ ދިވެހި ފިލްމީ ފަންނާނުންގެ ހައްގުތައް ގެއްލިގެންދާ ފަދަ ޢަމަލެއް ކަމަށާއި މިކަން ހަރުކަށި އިބާރާތުން ކުށްވެރި ކުރާ ކަމަށެވެ. އަދި ފިލްމީ ދާއިރާގެ ތަރައްގީއަށް މަސައްކަތްކުރާ ފަރާތްތަކުގެ ހައްގުތައް ހިމާޔަތްކޮށް، މިފަދަ ކަންކަން ތަކުރާރުވިޔަ ނުދިނުމަށް ކަމާބެހޭ ފަރާތްތަކުން އަވަސް ފިޔަވަޅުތަކެއް އެޅުމަށް ވެސް ވަނީ ގޮވާލާފައެވެ.

ކަޒްމިކް އިންޓަރނޭޝަނަލް އަދި އައިފިލްމްސްގެ ފަރާތުން ނެރުނު ބަޔާނުގައި އިތުރަށް ބުނީ އެން.ސީ.އޭގެ މި ނިންމުމާ ގުޅިގެން، ކުރިން ހަމަޖެހިފައިވާ ގޮތަށް ނޮވެމްބަރު 20 ގައި ޕްރިމިއަރ ބޭއްވުމަށް ކުރެވެން އޮތް ހުރިހާ މަސައްކަތެއް ކުރަމުން ގެންދާނެ ކަމަށެވެ. އަދި މި ދަތި ހާލަތުގައި ވެސް ބެލުންތެރިންނަށް ފިލްމު ދެއްކުމަށް ކުރެވެން އޮތް ހުރިހާ މަސައްކަތެއް ކުރާނެކަން ޔަގީންކަން ވެސް ވަނީ ދީފައެވެ.

ހަމަމިއާއެކު މި ކަމުގައި ދިވެހި ސަރުކާރުގެ ކަމާބެހޭ އިދާރާތަކުން އަވަސް ހައްލެއް ހޯދައިދިނުމަށް އެދި ގޮވާލާފައިވާއިރު، ދިވެހި ފިލްމީ ސިނާއަތުގެ ކުރިމަގަށްޓަކައި، މިފަދަ ކަންކަން ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އެޅުމަށް ވެސް ވަނީ އިލްތިމާސް ކޮށްފައެވެ.