މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަން އުވާލައި، މީޑިއާ އެންޑް ބްރޯޑްކާސްޓިންގ ކޮމިޝަންގެ ނަމުގައި އައު ކޮމިޝަނެއް އުފެއްދުމަށް ސަރުކާރުން މަސައްކަތްކުރައްވާތީ، އެމްޑީޕީގެ ރައީސް ޢަބްދުﷲ ޝާހިދު ކަންބޮޑުވުން ފާޅުކުރައްވައިފިއެވެ.

'އެކްސް' ގައި ކުރެއްވި ޕޯސްޓެއްގައި ޝާހިދު ވިދާޅުވީ ދަލާއި ލޭ އޮހޮރުވައިގެން ހޯދި ޚިޔާލު ފާޅުކުރުމާއި ނޫސްވެރިކަމުގެ މިނިވަންކަން އޮބަހައްޓައި ތަޅު އެޅުވޭ ގޮތަށް ސަރުކާރުގެ ފަރާތުން މަޖިލީހަށް ބިލެއް ހުށަހެޅުމަކީ އިންތިހާ އަށް ކަންބޮޑުވާ ކަމެއް ކަމުގައެވެ.

މީގެއިތުރުން އެފަދަ ބިލެއް ހުށަހެޅީ، ވެރީންގެ ނާގާބިލުކަމާއި ފަސާދައިގެ ޢަމަލުތައް ފަރުދާކުރަން ކަމަށް ވެސް ވަނީ ވިދާޅުވެފައެވެ. އަދި ކޮންމެ ދުވަހެއްގައި ވެސް ފެނިގެން މިދަނީ ޚުދުމުޚްތާރުކަމުގެ ސިފަ ކަމަށެވެ.

މޯލްޑިވްސް މީޑިއާ ކައުންސިލާއި ބްރޯޑްކާސްޓިންގ ކޮމިޝަން އުވާލައި، މީޑިއާ އެންޑް ބްރޯޑްކާސްޓިންގ ކޮމިޝަންގެ ނަމުގައި އައު ކޮމިޝަނެއް އުފެއްދުމަށް ރައްޔިތުންގެ މަޖިލީހަށް ބިލެއް ރައްޔިތުންގެ މަޖިލީހަށް ހުށަހެޅއްވީ ތުޅާދޫ ދާއިރާގެ މެންބަރު ޢަބްދުލްޙަންނާން ޢަބޫބަކުރުއެވެ.

މި ބިލުގެ މަގްސަދަކީ ނޫސް މަޖައްލާ ރަޖިސްޓްރީކުރުމަށް ލުއި ފަސޭހަ އަދި ހަރުދަނާ މިންގަނޑުތަކެއް ކަނޑައަޅައި ދިނުމެވެ. އަދި ބްރޯޑްކާސްޓިންގ ދާއިރާ ވެސް ހިމެނޭހެން މީޑިއާގެ ކަންކަން ތަންފީޒުކުރުމަށް ވަކި މުއައްސަސާއެއް ހެދުމެވެ.

އަލަށް އުފައްދާ ކޮމިޝަނުގެ ގާނޫނުގެ ނަމުގައި މަޖިލީހަށް ހުށަހަޅުއްވާފައިވާ މި ބިލުގައިވާގޮތުން ބިލު ގާނޫނަކަށްވުމުން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ނަމުގައި ކޮމިޝަނެއް އުފެދިގެންދާނެއެވެ. އަދި އެ ކޮމިޝަން ވެގެންދާނީ މިނިވަން ގާނޫނީ ޝަހުސަކަށް ކަމަށް ބިލުގައި ބަޔާންކޮށްފައި ވެއެވެ.