"ބަދަހި ޢާއިލާ - އުފާވެރި މުޖުތަމަޢު" މި ޝިއާރުގެ ދަށުން ހާއްސަ އާއިލީ ހަވީރެއް ބޭއްވުމަށް ނިންމައިފިއެވެ.

މިއި ހަފްތާ 52 ގެ ކާމިޔާބީތަކާ ގުޅިގެން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާ އިންތިޒާމުކޮށްގެން ބާއްވާ ހަވީރެކެވެ.

މި ހިނގާ ނޮވެމްބަރ މަހުގެ 16 ވާ ހޮނިހިރު ދުވަހު ބާއްވާ މި ހަވީރުގެ މަގްސަދަކީ އާއިލީ މާހައުލެއްގައި، އެ ވުޒާރާއިން ފާއިތުވި އަހަރުގެ ތެރޭގައި ކުރެވުނު މަސައްކަތްތަކުން ހާސިލުކުރެވުނު ކާމިޔާބީތައް ރައްޔިތުންނާއި ހިއްސާކުރުމެވެ.

މީގެއިތުރުން އަންހެނުންނާއި، ކުޑަކުދިންނާއި، ނުކުޅެދުންތެރިކަން ހުންނަ ފަރާތްތަކާއި އަދި އިސްރަށްވެހިންނަށް އަމާޒުކޮށްކޮށްގެން ކުރިއަށް ގެންދިޔަ މަސައްކަތްތަކާއި، އެވުޒާރާއިން ފޯރުކޮށްދެމުން އަންނަ ހިދުމަތްތަކުގެ މައުލޫމާތު ރައްޔިތުންނަށް ފޯރުކޮށްދިނުމެވެ.

ހުޅުމާލެ ސެންޓްރަލް ޕާކުގައި ހަވީރު 4 ން އިރުއޮއްސި 6 ޖަހަންދެން ކުރިއަށްދާ މި ހަވީރުގައި ތަފާތު ގޭމް ސްޓޯލްތަކާއި، ކާބޯތަކެތީގެ ސްޓޯލްތައް ހުންނާނެއެވެ. އަދި ތަފާތު މެސްކޮޓްތަކުގެ ހަރަކާތްތައް ވެސް ކުރިއަށް ދާނެއެވެ.

އާއިލީ ހަވީރުގައި އެ ވުޒާރާއާއެކު އިސްކޮށް ހަރަކާތްތެރިވާނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނާއި ހައުސިންގް ޑިވެލޮޕްމަންޓް ކޯޕަރޭޝަނެވެ. އަދި އުރީދޫއާއި، މޯލްޑިވްސް ޕެންޝަން އެޑްމިނިސްޓްރޭޝަން އޮފީހާއި މޯލްޑިވްސް ޕޮލިސް ސަރވިސް ވެސް ހަރަކާތްތެރިވާނެއެވެ.

މީގެއިތުރުން ނެޝަނަލް ސޯޝަލް ޕްރޮޓެކްޝަން އޭޖެންސީ، އަދި ފެމިލީ ޕްރޮޓެކްޝަން އޮތޯރިޓީން ވެސް ބައިވެރިވުމަށްވަނީ ހަމަޖެހިފައެވެ.