ދިވެހި ފިލްމު ދޭދަރު ރުއިން ފިލްމުގެ ޕްރެމިއަރ ކުރުން މި މަހު 20 ވަނަ ދުވަހުގެ ރޭ އޮންނާނެ ކަމަށް ކަޒްމިކް އިންޓަރނޭޝަނަލް އަދި އައިފިލްމްސް އިން ބުނެފިއެވެ.

އެ ދެ ޕްރޮޑަކްޝަނުން ބުނީ ދޭދަރު ރުއިން ފިލްމު ޕްރިމިއަރ ނޮވެމްބަރު 20 ގައި ބޭއްވޭނެ ގޮތަށް މަގުފަހިވެފައިވާ ކަމަށެވެ. އެގޮތުން އެ ފިލްމުގެ ޕްރިމިއަރ ޝޯވ ބޭއްވުމަށް ހަމަޖެހިފައިވާ އޮލިމްޕަސް ސިނަމާ ހޯލު ކުއްލިއަކަށް އަތުލުމަށްފަހު، އެ ނިންމުން އަނބުރާ ގެންދިޔަކަމަށް ނޭޝަނަލް ސެންޓަރ ފޯ ދި އާޓްސް (އެން.ސީ.އޭ) އިން އަންގާފައިވާ ކަމަށެވެ.

"އަޅުގަނޑުމެންނަށް ބޮޑު ގެއްލުމެއްވެ، ލިބިފައިވާ ހައްގުތަކެއް ގެއްލޭނެ ގޮތަށް މި ކަން ނިމިގެން ނުދިޔައިކަމަށްޓަކައި މިކަމަށް ޝުކުރުވެރިވަމެވެ. އަދި ލަހުން ނަމަވެސް، އެން.ސީ.އޭ ގެ ހަގީގީ ދައުރު އަދާކޮށް، ދިވެހި ފަންނުވެރިންނަށް ގެއްލެމުންދިޔަ އިތުބާރު އަލުން އިއާދަވުމުގެ ފެށުމެއްކަމުގައި މިއީ ދެކެމެވެ." ކަޒްމިކް އަދި އައިފިލްމްސް އިން ނެރުނު ބަޔާނެއްގައި ވެއެވެ.

މީގެއިތުރުން ދޭދަރު ރުއިން ފިލްމުގެ ޕްރިމިއަރ ޝޯ 20 ނޮވެމްބަރު ވާ ބުދަ ދުވަހުގެ ރޭ އޮލިމްޕަސް ސިނަމާގައި އޮންނާނެކަން ހާމަކޮށް، ބުނީ މި ފިލްމުގެ ބެލުންތެރިންނަށް މި އުފާވެރި ޚަބަރު އިއުލާނުކުރުމަށް ލިބުނު ފުރުސަތު ހިތްހަމަޖެހުމާއިއެކު ބަލައިގަންނަ ކަމަށެވެ.

މި ދިމާވި ކުއްލި މައްސަލައިގައި ހިތްވަރަކަށްވެ، ހަމަ މަގަށް އަލުން ގެނައުމަށް ގޮވާލައި އަޑު އުފުލާ، މިކަމުން އަރައިގަތުމަށް އެހީތެރިވި ހުރިހާ ފަރާތްތަކަށް ހިތުގެ އެންމެ ފުންމިނުން ޝުކުރު އަދާކުރައްވާ ކަމަށާއި ހާއސަކޮށް މޯލްޑިވްސް ފިލްމް އެސޯސިއޭޝަނާއި، ދިވެހި ފިލްމީ އަދި މިއުޒިކީ ފަންނާނުންނާއި، އާންމު ރައްޔިތުންނާއި، މީޑިއާގެ އެހީތެރިކަމާއި އެއްބާރުލުން އެ ދެ ޕްރޮޑަކްޝަނުން ފާހަގަކޮށްފައި ވެއެވެ.

ހަމަމިއާއެކު މި މަހުގެ 18 އަދި 19 ވަނަ ދުވަހު އެން.ސީ.އޭ އިން އޮލިމްޕަހުގައި ބޭއްވުމަށް ހަމަޖެހިފައިވާ 'އޮލިމްޕިއަންސް ވިތް ޔޫތް - ލައިވް އިން ކޮންސަރޓް' ގައި ބައިވެރިވާ ހުރިހާ ފަންނާނުންނަށް ކާމިޔާބު ޝޯވ އަކަށް ވެސް ވަނީ އެދިފައެވެ.

ދޭދަރު ރުއިން ފިލްމުގެ އަދި ޕްރިމިއަރ ޝޯވ ގެ ޓިކެޓް މިހާރު އަލުން ވިއްކަން އަންނައިރު، ހޮޓްލައިން 7242555 ނަންބަރަށް ވައިބަރ މެދުވެރިކޮށް މެސެޖްކުރުމުން ޓިކެޓް ގަނެވޭނެ އިންތިޒާމު މިހާރުވަނީ ހަމަޖައްސާފައެވެ.