މ. ދިއްގަރުގައި ގައިންގަޔަށް ނާރާ ބަލިތަކުގެ ކްލިނިކެއް ހުޅުވައިފިއެވެ.

އެރަށު ސިއްހީ މަރުކަޒުގައި ގާއިމުކުރި މި ކްލިނިކް ހުޅުވައުދެއްވީ އެކަމަށްޓަކައި ބޭއްވި ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދުއެވެ.

މި ކްލިނިކް ހުޅުވައިދެއްވުމަށްފަހު އެކަމަނާ ވަނީ ކްލިނިކް ބައްލަވާލައްވައި، ފޯރުކޮށްދޭ ހިދުމަތްތަކުގެ މަޢުލޫމާތު އޮޅުންފިލުއްވާފައެވެ. އަދި ސިއްހީ މަރުކަޒުގެ އިއްޒަތްތެރިން ސޮއިކުރައްވާ ފޮތުގައި ވަނީ ސޮއިކުރައްވާފައެވެ.

މި ރަސްމިއްޔާތުގައި ދިއްގަރު އެމަރުކަޒުގެ ފަރާތުންނާއި ދިއްގަރު ކައުންސިލް އިދާރާގެ ފަރާތުން ވަނީ އެކަމަނާ އަށް ހަދިޔާއެއް ވެދުމަށް އަރުވާފައެވެ.

ރައީސްގެ އަނބިކަނބަލުން ދިއްގަރަށް ކުރައްވާ މި ދަތުރުފުޅުގައި އެރަށު ސްކޫލުގައި ބާއްވާ ހަކުރުބަލީގެ ދުވަހުގެ ހާއްސަ ހަފްލާ ޝަރަފުވެރިކޮށްދެއްވާނެއެވެ.