"ދާލަން: ނެޝަނަލް ސްކިލްސް އެންޑް ކެރިއަރ އެކްސްޕޯ 2024" މާދަމާ ފެށުމަށް ތައްޔާރުވަމުން އަންނައިރު، 41 ސްޓޯލް ހުންނާނެ ކަމަށް ހަޔަރ އެޑިއުކޭޝަން މިނިސްޓްރީން ވިދާޅުވެއްޖެއެވެ.

އެ މިނިސްޓްރީން ވިދާޅުވީ މި ސްޓޯލްތަކުގައި މިނިސްޓްރީގެ ދަށުން މަސައްކަތްކުރަމުންދާ އިދާރާތަކާއި ސަރުކާރުގެ އެހެނިހެން އިދާރާތަކާއި އަމިއްލަ ވިޔާފާރިތަކުން ތަފާތު އެކި ހަރަކާތްތަށް ކުރިއަށްގެންދިޔުމަށް ތައްޔާރުވަމުން އަންނަކަމަށެވެ.

ނޮވެމްބަރ 15 އަދި 16 ވަނަ ދުވަހުގެ ހަވީރު 4 ޖަހާއިރު، ހުޅުމާލޭ ސެންޓްރަލް ޕާކުގައި ބޭއްވުމަށް ހަމަޖެހިފައިވާ މި އެކްސްޕޯގައި ގުރުވަތުން ހޮވޭ ނަސީބުވެރިންނަށް އިނާމު ހަވާލުކުރުމަށް ހަމަޖެހިފައިވަނީ ދެ ދުވަހަކަށް ބަހައިލައިގެންނެވެ.

ދާލަން ލަކީ ޑްރޯގެ އިނާމުތަކުގެ ތެރޭގައި 6 ފަރާތަކަށް ދިރާގުގެ މައި-ފައި ޑިވައިސްގެ 3 މަހުގެ ޕެކޭޖު ލިބޭއިރު، ސީގަލް މޯލްޑިވިސްގެ ފަރާތުން ސީ ސްޕޯޓްސްގެ ގިފްޓް ވައުޗަރ ވެސް ހިމެނެއެވެ. އަދި ވޮޔޭޖެސް މޯލްޑިވިސްގެ ފަރާތުން ސީގަލް ކެފޭގެ ގިފްޓް ވައުޗަރއާއި ޔޫރޯ މާކެޓިންގ ގެ ފަރާތުން ދެ ފަރާތަކަށް ގިފްޓް ހެމްޕަރ ވެސް ހިމެނެއެވެ.

މީގެއިތުރުން މިނީސޯގެ ފަރާތުން 3 ފަރާތަކަށް ގިފްޓް ވައުޗަރ އާއި ބޮޑީ ޓެކް ޖިމްގެ ފަރާތުން 2 ފަރާތަކަށް 3 މަހުގެ މެމްބަރޝިޕްއާއި ވޯޓަރ ސައިޑްގެ ފަރާތުން މީލް ވައުޗަރެއް އަދި ކަސަބް އާރޓްސްގެ ފަރާތުން ބޭސިކް ކަސަބު ކްލާސް ގިޕްޓް ވައުޗަރ ވެސް ލަކީޑްރޯގައި ހިމެނެއެވެ. އަދި ކްލޭ ސްޓޫޑިއޯގެ ފަރާތުން ހޭންޑް ވީލް ގިފްޓް ވައުޗަރއާއި މަރްކީގެ ފަރާތުން ނައިކީ ޑަންކް ޝޫޒްގެ ގިފްޓް ވައުޗަރ ވެސް ހިމެނެއެވެ.

ދާލަން އެކްސްޕޯ ލަކީޑްރޯގައި ދެން ހިމެނެނީ ކްލޭ ސްޓޫޑިއޯގެ ފަރާތުން ޓޭސްޓަރ ވީލް ގިފްޓް ވައުޗަރއާއި ވީ މާކެޓިންގ ގެ ފަރާތުން ފޮޓޯގްރަފީ ސެޝަންގެ ގިފްޓް ވައުޗަރއާއި ކައިމޫ ޓްރެވަލްސް އެންޑް ހޮޓެލްސް ސަރވިސެސްގެ ފަރާތުން އެނބޫދޫ ވިލެޖްގައި ދެ ފަރާތަކަށް އެއްދުވަހު ހުރުމުގެ ފުރުސަތެވެ.