އެމްޑީޕީ ސަރުކާރުގެ ގެދޮރުވެރިޔާ ސްކީމްގެ ދަށުން 4،000 ފްލެޓު ލިބޭ މީހުންގެ ލިސްޓު މި މަހުގެ 17 ގައި އާންމުކުރާނެކަމަށް ހައުސިންގ މިނިސްޓަރ ޑރ. ޢަލީ ހައިދަރު އަހްމަދު ވިދާޅުވެއްޖެއެވެ.

ހުޅުމާލޭ ދެވަނަ ފިޔަވަހީގައި އިމާރާތްކުރާ މި ފްލެޓުތައް ލިބޭ މީހުންގެ ލިސްޓު އާންމުކުރައްވާނެ ކަމަށް މިނިސްޓަރު ވިދާޅުވީ ހިޔާވަހި ފައިނޭންސިން ސްކީމްގައި ބައިވެރިވުމަށް ދިމާވާ ދަތިތަކަށް ހައްލު ހޯދައިދިނުމަށް ކުރާ މަސައްކަތްތަކާ ގުޅޭ ގޮތުން ބޭއްވި ނޫސްވެރިންގެ ބައްދަލުވުމުގައެވެ.

އެމަނިކުފާނު މީގެކުރީން ވެސް ވިދާޅުވެފައިވަނީ މި ހަފުތާ ތެރޭގައި ފްލެޓް ލިސްޓް ނެރެެން ނިންމާފައިވާ ކަމަށެވެ.

ރާއްޖޭގައި ބޯހިޔާވަހިކަމަށް ދިމާވެފައިވާ ދަތިތަކަށް ހައްލު ހޯދައިދިނުމަށް އެމްޑީޕީ ސަރުކާރުން ފެށި ގެދޮރުވެރިޔާ ސްކީމްއާ ގުޅިގެން ގިނަ މައްސަލަތައް ފާހަގަވެ، އޭސީސީން ވަނީ ބަލާފައެވެ. އޭސީސީން އެ މައްސަލަ ބެލުމަށްފަހު، ހާމަކުރައްވާފައިވަނީ ޝަތުރު ހަމަވެ، އެއްވެސް މައްސަލައެއް ނެތީ އެ ލިސްޓުން 20.7 ޕަސެންޓް ފޯމުގައި ކަމަށެވެ.

އެ ކޮމިޝަނުން އާންމުކުރެއްވި ތަފާސްހިސާބުތަކުން ހާމަވާ ގޮތުން ޝަތުރު ހަމަވި ނަމަވެސް 19.7 ޕަސެންޓް ފޯމުގައި މައްސަލަ ހުރި ކަމަށް ވެސް ފާހަގަ ކޮށްފައި ވެއެވެ. އަދި މުޅި ލިސްޓުގެ 59.6 ޕަސެންޓް މީހުން ނުވަތަ ފޯމްގައި ޝަތުރު ހަމަނުވާކަން ވެސް އެ ކޮމިޝަނުން ފާހަގަކުރައްވާފައި ވެއެވެ.