ޓޫރިޒަމް މިނިސްޓްރީން ފަތުރުވެރި އާއިލީ ހަވީރެއް ބާއްވަން ނިންމައިފިއެވެ.

އެ މިނިސްޓްރީން ހާމަކުރައްވާފައިވާ ގޮތުގައި ހުޅުމާލޭގައި ފޭސް އެކެއްގައި މާދަމާ ބާއްވާ މި ހަވީރަކީ ވޭތުވެދިޔަ އެއް އަހަރުތެރޭ އެ މިނިސްޓްރީން ހާސިލްކޮށްފައިވާ ކާމީިޔާބީތައް ފާހަގަކުރުމުގެ ގޮތުން ބާއްވާ އާއިލާ ހަވީރެކެވެ.

މި ހަވީރުގެ ހަރަކާތްތައް އިންތިޒާމްކޮށްފައިވަނީ ދެމެހެއްޓެނިވި ފަތުރުވެރިކަމަށް ކަމުގައި ވެސް ވިދާޅުވެއެވެ.

ހުޅުމާލޭ ފޭސް 1 ގައި ދިރާގު އެންޓެނާ އާ ދިމާ ބީޗު ސަރަހައްދުގައި ބާއްވާ މި ހަވީރު، އޮންނާނީ ހުކުރު ދުވަހު ހަވީރު 4 ން އިރުއޮއްސި 6 ޖަހަންދެނެވެ.

އެ މިނިސްޓްރީން ހާމަކުރައްވާފައިވާ ގޮތުގައި ގުދުރަތީ ވެއްޓާއި ކަނޑު ގެ ތީމަށް ބާއްވާ މި ހަވީރުގައި މިތީމަށް ކުރެހުމާއި، ކްރާފްޓް އެކްޓިވިޓީތައް އޮންނާނެއެވެ. އަދި އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުން ކުރާ ހަރަކާތްތައް ވެސް ކުރިއަށްދާނެއެވެ.

މީގެއިތުރުން ބަނާނާ ބޯޑާއި، ޖެޓް ސްކީ އާއި ފަން ޓިއުބް ހަރަކާތް ވެސް ކުރިއަށް ގެންދިއުމަށް ނިންމާފައިވާކަމަށް ވިދާޅުވެއެވެ.