ލައިފްސްޓައިލް އިންޓަވެންޝަން ޕްރޮގްރާމް އިފްތިތާހުކޮށްފިއެވެ.

މި ޕްރޮގްރާމު އިފްތިތާހުކޮށްދެއްވާފައިވަނީ އެރަށުގައި ބޭއްވި ހާއްސަ ރަސްމިއްޔާތެއްގައި ރައީސް ޑރ. މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދުއެވެ.

މި ޕްރޮގްރާމުގެ ބޭނުމަކީ ދެމެހެއްޓެނިވި ބަދަލެއް ދިރިއުޅުމުގެ ވައްޓަފާޅިއަށް ގެނެސްގެން ހަކުރުބައްޔާއި ގައިންގަޔަށް ނާރާ ބަލިތައް ޖެހުމުގެ ފުރުސަތު ކުޑަކުރެވޭ މިންވަރު ދެނެގަތުމެވެ.

މި ޕްރޮގްރާމުގެ ދަށުން އެރަށުގެ 16 އަހަރުން މަތީގެ އާބާދީއަށް އަމާޒުކޮށް ސްކްރީން ކުރެވި، ހަކުރުބަލި ޖެހުމުގެ ފުރުސަތު ބޮޑު ކަމަށް ލަފާކުރެވޭ އާބާދީއަށް އަމާޒުކޮށް، އެ ފަރާތްތަކުގެ ދިރިއުޅުމުގެ ވައްޓަފާޅިއަށް ގެނެވޭ ބަދަލުގެ ސަބަބުން އެ މީހުންގެ ސިއްހީ ހާލަތަށް އަންނަ ބަދަލު ވަޒަންކުރެވޭނެއެވެ.

މި ޕްރޮގްރާމް ހިންގުމަށްޓަކައި ދިއްގަރުން ހޮވާލެވުނު 10 ފަރާތަކަށް ލައިފްސްޓައިލް ކޯޗުންގެ ގޮތުގައި މިހާރު ވަނީ ތަމްރީނު ދެވިފައެވެ.

މިއަހަރުގެ ހަކުރު ބަލީގެ ދުވަހަށް އިންޓަރނޭޝަނަލް ޑައިބިޓީސް ފެޑެރޭރަޝަނުން ކަނޑައަޅުއްވާފައިވާ ޝިޢާރު ކަމަށްވާ، "ހަކުރުބައްޔާއި ދުޅަހެޔޮކަން" މި ޝިޢާރުގެ ދަށުން ނަފްސާނީ، ޖިސްމާނީ އަދި އިޖުތިމާއީ ދުޅަހެޔޮކަމަށް އިސްކަންދެވޭނެއެވެ.